स्वंगू दलया संयन्त्रय् भागबन्दा मुख्य खँ

शान्ति सुरक्षायात कयाः थौं मन्त्रिपरिषद् बैठक

येँ (सन्ध्या टाइम्स)/राजनीतिक गतिरोध अन्त्यया निंतिं स्वनातःगु उच्चस्तरीय राजनीतिक संयन्त्रय् प्याकेजया रुपय् हे सहमति ब्वलंकेगु खँ वःगु खःसां अन दुने जुइगु वार्ताया धाःसा मूलतः पद व शक्ति भागबन्दाय् हे केन्द्रिकृत जुइगु खँ धाःगु दु ।

थनिंनिसें उगु संयन्त्रया मुँज्याय् १२ बुँदाया समझदारींनिसें लिपांगु इलय् तकया दुने जूगु सहमति बारे समीक्षा, विश्वासया वातावरण निर्माण, राजनीतिक गतिरोध अन्त्य, माओवादी जनसेनाया समायोजन व व्यवस्थापन, संविधान निर्माणय् वयाच्वंगु मतभिन्नताया अन्त्य व शक्ति बाँडफाँड विषयय् नं सहलह जुइ धाःगु दु। थौं सनिलया ४ बजे संयन्त्रया बैठक होटल याक एण्ड यतिइ च्वनेत्यंगु दु ।

खुगुलिं बुँदाय् सहलह ब्याकेमाःगु नापं भागबन्दा तकं मिले यायेमाःगु जुयाः संयन्त्रया बैठक तःन्हु तक न्ह्यायेफु धाःगु दु।
म्हिगः च्वंगु संयन्त्रया मुँज्याय् थनिंनिसें खुगू बुँदाय् सहलह ब्याकेगु सहमति बाहेक मेगु छुं नं निर्णय मजू। म्हिगःया मुँज्याय् म्हं मफयाः संयन्त्रया संयोजक नेकां सभापति गिरिजाप्रसाद कोइराला उपस्थिति जुयामदी ।

उखे मन्त्रिपरिषदया मुँज्या थौं न्हिनय् २ बजे लिपा च्वनीगु जूगु दु। मुँज्याय् उच्चस्तरीय राजनीतिक संयन्त्रया भूमिका, लिपांगु इलय् वयाः थीथी संचार उद्यमी नापं संचारकर्मीतय्त जुयाच्वंगु सांघातिक आक्रमण, देय्या शान्ति सुरक्षाया स्थिति आदि विषयय् सहलह जुइ धाःगु दु। मन्त्रीतय्सं थौंया मुँज्या नियमित खः धाःसां राजनीतिक तरलता नापं शान्ति सुरक्षाय् न्ह्यसः ब्वलनाच्वंगु कारणं थौं आकाझाकां बैठक च्वनेत्यंगु खँ विज्ञ सूत्रं धाःगु दु ।

प्रचण्डया छेँय् झलनाथ
राजनीतिक गतिरोध अन्त्य यायेगु मुल विषय ज्वनाः सहलह यायेत एमाले अध्यक्ष झलनाथ खनाल थौं सुथय् माओवादी अध्यक्ष प्रचण्डया छेँय् थ्यन। उगु इलय् एमाले अध्यक्ष खनालं थःपिनिगु पार्टीं तयार याःगु रोडम्याप स्वीकार यायेत प्रचण्डयात इनाप यानादीगु खः। थ्व रोडम्याप कथं वन धाःसा समस्या याकनं ज्यनीगु तर्क नं अध्यक्ष खनालं अन यानादीगु खः ।