कन्सर्न नेपालपाखें मानवाधिकार तुच्चा
येँ (सन्ध्या टाइम्स)/कन्सर्न नेपालया झिंन्हय्दँ बुन्हिया लसताय् 'मानव अधिकार तुच्चा' ज्याझ्वः जुल। कन्सर्न नेपालया थःगु हे ज्याकुथी जूगु उगु ज्याझ्वलय् देय्या मानव अधिकार व बाल अधिकारया ख्यलय् ज्या यानाच्वंपिं आपालं अधिकारकर्मीतय्सं ब्वति काःगु खः ।
बाल अधिकारयात नं मानव अधिकारया छगू अभिन्न ब्व खः धइगु खँ बोध यायेगु ताः तयाः सक्रिय जुयाच्वंगु कन्सर्न नेपालया दावी कथं नेपाःया ४४ प्रतिशत नागरिक १६ दँ क्वय्यापिं मस्त खःसा उकी मध्ये २५ लाख स्वयां अप्वः मस्त देय्न्यंकं ८४ ताजिया थीथी ज्याय् बाल मजदूर जुयाः ज्या यानाच्वंगु दु। थ्व मस्तय्गु आर्थिक सबलताया नापं शैक्षिक अधिकार प्राप्तीया लागिं 'सकसियां लागिं शिक्षा' धइगु नारायात ताःलाके माःगु माग कन्सर्न नेपालं याःगु दु ।
