'सर्त पूमवंकुसाः माओवादी नेतृत्वया सरकार असम्भव'
नेकपा (एमाले)या वरिष्ठ नेता केपी शर्मा ओलीं एनेकपा (माओवादी) नेतृत्वया सरकार निर्माण यायेत स्वंगू सर्त पूवंकेमाःगु खँ धयादीगु दु । वय्कलं यदि माओवादीं सर्त पूमवंकूसाः माओवादी नेतृत्वया सरकार सम्भव मजूगु नं धयादिल ।
बुधवाः पार्टी कार्यकर्तातय्त नापलायेत चितवनया भरतपुर थ्यंकादीम्ह ओलीं माओवादी हिंसा त्वःताः शान्तिपूर्ण लँपूइ वयेमाःगु, विद्रोह व बल छ्यलेगु ज्या त्वःताः संवैधानिक प्रकृयाय् वयेमाःगु व पार्टीयात सशस्त्र जत्था पाखें नागरिकया पार्टी दयेकेमाःगु स्वंगू सर्त दुगु धयादिल । वय्कलं थुपिं सर्त पूवंकुसाः जक माओवादी नेतृत्वया सरकार निर्माण यायेगु खँय् समर्थन यायेफइगु धयादिल ।
आः नं बहुमत हयाः माओवादी नेतृत्वया सरकार गठन यायेत सुनां मपंगु धयादिसें बहुमत हयेमफुसाः वर्तमान सरकारय् वयेत ओलीं माओवादीयात इनाप यानादिल । वय्कलं स्वंगू दलीय संयन्त्रया बैठक जुयाच्वंगु व उकीं दलत दथुइया अविश्वास व असमझदारी चीकीगु विश्वास प्वंकादिल ।
