लडाकुया विवरण मब्यूगु आपत्तिजनक : सरकार
नेपाः स्थित राष्ट्रसंघीय मिसन अनमिनं माओवादी लडाकुया विवरण उपलब्ध मयाःगु खँयात सरकारं गम्भीर व आपत्तिजनक धाःगु दु ।
सरकारं छवाः न्ह्यः फ्वंगु माओवादी लडाकुया विवरण बीत अनमिनं अस्वीकार याःगु खँयात कयाः शान्ति व पुननिर्माण मन्त्रालयं बुधवाः छगू विज्ञप्ति पिथंसें लडाकुया नां, थाय्-बाय्, फोटोलगायत विवरण प्राप्त यायेगु अधिकार सरकारनाप सुरक्षित जूगु खँ न्ह्यथंनातःगु दु ।
सरकारं छुं गोप्य सूचं मफ्वंगु प्रष्ट यासें विज्ञप्तिइ, 'थंज्याःगु तथ्यांक गोप्यताया आधारय् बीमज्यूगु धकाः अनमिनं पिथंगु विज्ञप्तियात नेपाः सरकारं गम्भीर रुपं काःगु दु ।' विज्ञप्तिइ सरकारं लडाकुतय् मासिक भत्ता व भरणपोषण खर्च बीयाच्वंगु धासें शिविरं बहिर्गमन जुइधुंकूपिं लडाकुतय् नांमय् थंज्याःगु ध्यबा भुक्तानी जुइफुगु धासें लडाकुतय् विवरण बीत माग नं याःगु दु ।
