एमालेया प्रस्तावय् सहिमति प्वंकादिसं : खनाल
नेकपा (एमाले)या अध्यक्ष झलनाथ खनालं वर्तमान राजनीतिक गतिरोध अन्त्यया निंतिं थःगु पार्टीं प्रस्ताव याःगु कार्यदिशाय् सहमति प्वंकेत माओवादीयात इनाप यानादीगु दु ।
बुधवाः सुथय् एनेकपा (माओवादी)या अध्यक्ष पुष्पकमल दाहाल 'प्रचण्ड'नाप जूगु खँल्हाबंलाय् एमाले अध्यक्ष खनालं राष्ट्रिय सहमतिया निंतिं एमालें न्ह्यने सारे याःगु कार्यदिशाय् सहमति प्वंकेत इनाप यानादीगु खः ।
छुं दिं न्ह्यः एमालेया केन्द्रीय समितिं आधिकारीक धारणा पितब्यूसें राष्ट्रिय सहमतिया निंतिं माओवदी नागरिक दलय् रुपान्तरण जुइमाःगु लगायत खुगू सर्त न्ह्यब्वःगु खः । एमालें माओवादीं यदि खुगू सर्त पूवंकूसाः राष्ट्रिय सहमतिया सरकारया बारे सहलह यायेफइगु खँ धाःगु खः ।
अथेहे प्रचण्ड व खनाल दथुइया खँल्हाबंलाय् संविधान निर्माण, लडाकु समायोजन, सत्ता साझेदारी लगायतया बारे नं खँल्हाबंला जूगु खः । प्रचण्ड निवास न्हू बजारय् मुक्कं नीगु मिनेट निम्ह शीर्ष नेतात दथुइ खँल्हाबंला जूगु खः ।
