राजधानीइ हानं मेगू गोली काण्ड
मंगलवाः सनिलय् राजधानी येँय् हानं मेगू छगू गोलीकाण्ड जूगु दुसाः अपराधीत हानं नं बिस्यूंवनेत ताः लाःगु दु । जनकपुरय् सोमवाः संचार उद्यमी अरुण सिंहानियाया हत्यां देय्या शान्ति सुरक्षाया बारे न्ह्यसः दनाच्वंगु इलय् हानं मेगू गोली काण्डं जूगु दु ।
मंगलवाः सनिलय् येँया लाजिम्पाट रानीवारी नापसं भरतपुरय् च्वंगु कलेज अफ मेडिकल साइन्सया अध्यक्ष नागेन्दर किशन पाम्पाटीयात अज्ञात पुचलं गोलीं क्येकूगु दु । गोलीं पाप्पाटी गयाच्वंगु गाडीया न्ह्याकनय् जक लागुलिं वय्कयात धाःसाः छुं मजू ।
बा. ६. च. ९९९९ नम्बरया रेन्ज रोभर गाडीलय् दीम्ह पाम्पाटीयात सनिलय्या ६:१५ इलय् अज्ञात पुचलं गोलीं क्येकूगु खः । प्रत्यक्षदर्शीं प्रहरीयात ब्यूगु जानकारी कथं गोली क्येकूम्ह अपराधी हाकूगु रंगया पल्सर मोटरसाइकलय् गयावःगु खः । मोटरसाइकलया ल्यून च्वम्ह अपराधीं गोलीं क्येकेवं उपिं सामाखुशी पाखे बिस्यूवंगु खः ।
भारतीय नागरिक पाम्पाटी हैदरवादया स्थायी निवासी खःसा वय्क येँया रानीबारीलय् वंगु झिदं न्ह्यः निसें च्वनावयाच्वंगु खः । वय्कयात गोली क्येकूगु घटनायात कयाः नेपाल चिकित्सक संघं आपत्ति प्वंकूसें तत्काल दोषीयात कडा स्वयां कडा कारवाहीया माग याःगु दु
