संयन्त्रया बैठकय् थःथःगु दलया दृष्टिकोण न्ह्यब्वल
स्वंगू प्रमुख राजनीतिक दलया शीर्ष नेतातय्सं मू राजनीतिक विषयलय् थःगु पार्टीया दृष्टिकोण, आशंका व अविश्वास न्ह्यब्वःगु दु । मंगलवाः च्वंगु उच्चस्तरीय राजनीतिक संयन्त्रया बैठकय् थःथ:गु पार्टीया बिचाः नापं राजनीतिक गतिरोध अन्त्य लगायत थीथी विषयलय् सहलह जूगु खः ।
यलया गोदावरी भिजेल रिसोर्टय् जूगु बैठकय् मुख्यत झिंनिगू बुँदे सम्झौताया समीक्षा, न्हूगु संविधान, माओवादी लडाकुया समायोज व व्यवस्थापनया बारे खँल्हाबंला जूगु खः । बैठकय् ब्वति काःपिं नेतातय्सं मंगलवाःया बैठकय् थःथःगु पार्टीया बिचाः तयेगु ज्या जूगु व थ्व सकारात्मक जूगु धासें संवादयात निरन्तरता बीगु खँ धाःगु दु ।
बैठक लिपाः एमाले अध्यक्ष झलनाथ खनालं दलतय्सं थःथःगु दुने दुगु आशंका व अविश्वास प्वंकेगु ज्या जूगु व थुकीं दलत छप्पँ जुयाः न्ह्याः वनेत अपूगु कनादिल । वय्कलं थुकीं विश्वासया वातावरण ब्वलंकीगु व सहमतिया निंतिं लँपू तयार जूगु कनादिल ।
माओवादी उपाध्यक्ष नारायणकाजी श्रेष्ठ 'प्रकाशं' सहलह सकारात्मक जूगु दाबी यानादिसें दलत दुने यक्व हे अविश्वास दुगु व थुकीयात थौंया बैठकय् न्ह्यब्वयेगु ज्या जूगु कनादिल । वय्कलं दलत दथुइ दक्वं विषयलय् तःधंगु भिन्नता दुसां सहमतिया निंतिं पृष्ठभूमि तयार जूथु कनादिल । अथेहे कांग्रेस संसदीय दलया नेता रामचन्द्र पौडेलं माओवादी लडाकुया समायोजन व राज्य पुनसंरचनाया विषयलय् विशेष सहलह जूगु कनदिसें याकनं हे सहमति जुइगु दाबी यानादिल ।
बैठकय् माओवादी अध्यक्ष पुष्पकमल दाहाल 'प्रचण्ड', उपाध्यक्षत डा. बाबुराम भट्टराई व नारायणकाजी श्रेष्ठ 'प्रकाश', नेतात देव गुरुङ व कृष्णबहादुर महराया उपस्थिति दुगु ख:सा कांग्रेसया वरिष्ठ नेता शेरबहादुर देउवा, उपसभापति रामचन्द्र पौडेल, नेतात डा. रामशरण महत, कृष्णप्रसाद सिटौला व महेश आचार्यया ब्वति दुगु ख: ।
अथेहे एमाले पाखें अध्यक्ष झलनाथ खनाल, गृहमन्त्री भीम रावल, नेता भरतमोहन अधिकारी, केपी शर्मा ओली व घनश्याम भूसालया उपस्थिति दुगु ख: ।
मंगलवाःया बैठकय् सहलह क्वमचाःगुलिं बुधवाः प्यताः इलय् हानं बैठक च्वनीगु जूगु दु । मंगलवाःया बैठकय् संयन्त्रया संयोजक गिरिजाप्रसाद कोइराला व आमन्त्रित दुजः प्रधानमन्त्री माधवकुमार नेपाल धाःसाः उपस्थित जुयामदी ।
