प्रम व गृहमन्त्री नाप स्पष्टीकरण
व्यवस्थापिका संसद अन्तर्गतया राज्य व्यवस्था समितिं मंगलवाः प्रधानमन्त्री माधवकुमार नेपाल व गृहमन्त्री भीम रावलनाप स्पष्टीकरण काःगु दु ।
समितिं प्रधानमन्त्री नेपाल नाप अख्तियार दुरुपयोग अनुसन्धान आयोग, निर्वाचन आयोग, महालेखा परिषद् लगायत संवैधानकि निकायलय् पदाधिकारीत नियुक्त यायेमफुगुया धासें स्पष्टीकरण काःगु खः । समितिया बैठकय् स्पष्टीकरण बियादिसें प्रधानमन्त्री नेपालं माओवादीया कारणं संवैधानिक नियुक्ति यायेमफूगु धयादिल । वय्कलं संवैधानिक नियुक्त यायेत सरकार गम्भीर जुसां माओवादीं थुकी ग्वाहालि मयाःगु द्वपं बियादिल ।
अथेहे शान्ति सम्झौता बिपरित ल्वाभ: ह:गु धासें माओवादीं अविश्वास प्रकट यानाच्वंगु इलय् राज्य व्यवस्था समितिं प्रधानमन्त्रीयात छवा:या दुने ल्वाभ:या बिवरण बीत निर्देशन ब्यूगु दु । प्रधानमन्त्री नेपालं ल्वाभ: सेनाया निंतिं मखसें प्रहरीयात शसक्त दयेकेत जूगु दाबी यानादिल ।
मंगलवाः हे राज्य व्यवस्था समितिं देशय् शान्ति सुरक्षा स्यनावनाच्वंगु बारे गृहमन्त्री नाप स्पष्टीकरण काःगु खः । समितिया बैठकय् दुजतय्सं शान्ति सुरक्षाया अवस्था चिन्ताजनक जूगु धासें गृहमन्त्रीया कुंखिंगु खः । गृहमन्त्री रावलं सरकारं देशय् शान्ति सुरक्षाया व्यवस्था यायेत कुतः याःसां बिचाः या: कथं ज्यायेमफुगु धयादिसें दुखः प्वंकादिल । वय्कलं शान्ति सुरक्षाया अवस्था क्वतुकेत सरकार गम्भीर जुयाः लगेजुयाच्वंगु धयादिल ।
अथेहे गृहमन्त्री रावलं जनकपुरया सञ्चार उद्यमी अरुण सिंहानियाया हत्यारायात नाकाबन्दी याना: मालेगु ज्या जुयाच्वंगु जानकारी बियादिल । वय्कलं अपराधी बिस्यू वनीगु सम्भावित थासय् नाकाबन्दी याना: मालेगु ज्या जुयाच्वंगु धयादिल ।
