सर्त माने यानाः माओवादी सरकारय् वनीमखु : गजुरेल
एकीकृत नेकपा (माओवादी)या सचिव सीपि गजुरेलं कांग्रेस व एमालें तःगु सर्त स्वीकार यानाः माओवादी सरकारय् मवनीगु खँ धयादीगु दु ।
सहिद परिवार समाज नेपालया न्हापांगु जिल्ला सम्मेलनय् झ्वलय् मंगलवाः सिन्धुलीइ ग्वसाःग्वःगु ज्याझ्वलय् न्ववानादिसें वय्कलं म्हो ल्याखय् लडाकु समायोजन, वाईसीएलया विघटन लगायत सर्त पूवंकाः माओवादी सरकारय् मवनीगु धयादिल । वय्कलं सर्त माने यानाः सरकारय् वंसाः क्रान्ति प्रति गद्धारी जुइगुलिं थथे यानाः सरकारय् वनेमफइगु धयादिल ।
वय्कलं झिंस्वद्वं नेपाःमितय् बलिदानं निर्माण जूगु सेनाया विषययात ख्याः मयायेत ख्याच्वः बियादिल । अनमिनं निक्वः तक प्रमाणिकरण यानाः ल्यं दु झिंनयाद्वं लडाकुयात समायोजन छाय् मयायेगु धासें वय्कलं आक्रोश प्वंकादिल ।
अथेहे वय्कलं सामन्तीतय् छेँबुँ गरीब किसानतय्सं कब्जा याःगु धयादिसें छुं नं हालतं वयात लितबीमफइगु धयादिल । नापं वय्कलं जनताया सेवाय् लगे जूगु वाईसीएल विघटन यायेमफइगु धयादिल । माओवादी सचिव गजुरेलं दक्वं ख्यलं असफल जुयावंगु वर्तमान सरकार हिलेमाःगु धयादिसें माओवादी जनताया संघीय गणतान्त्रिक संविधान च्वयेत गम्भीर दुगु धयादिल ।
