हत्यया विरोधय् गृहमन्त्रालयलय् धर्ना
जनकपुरया संचार उद्यमी अरुण सिंहानियाया हत्याया विरोधय् नेपाल पत्रकार महासंघया नेतृत्वय् पत्रकारत गृहमन्त्रालयलय् धर्ना च्वंगु दु ।
मंगलवाः महासंघया नेतृत्वय् गृहमन्त्री भीम रावलयात ज्ञापनपौ लःल्हावंपिं पत्रकारतय्सं गृहमन्त्री नापलायेमखनेवं गृहमन्त्रलयया धोकाय् धर्ना च्वंगु खः । गृहमन्त्रीं पत्रकारतय्त स्वताः इलय् नापलायेगु ई ब्यूगु खःसां मन्त्रीं नापमलागुलिं उमिसं ज्ञापनपौ गृहमन्त्रलायया धोकय् त्वताः लिहांवःगु दु । उगु ज्ञापनपौलय् 'म्वाये व च्वये ब्यू' धकाः जक च्वयातःगु खः । पत्रकारतय्सं गृहमन्त्रीं थःपिंत ई मब्यूगु विरोधय् बुधवाः सिंहदरवार घेराउ यायेगु खँ धाःगु दु ।
वस्वां न्ह्यः मंगलवाः महासंघया ज्याकू संचारग्रामय् च्वंगु बैठकं हत्याया विरोधय् देय्न्यंक धर्ना व विरोध प्रर्दशन यायेगु लगायतया ज्याझ्वः सार्वजनिक याःगु खः । अथेहे हत्याया स्थलगत निरीक्षण यायेत महासंघया अध्यक्ष धर्मेन्द्र झा, केन्द्रीय दुजःत शम्भु झा व उमेश शाह उखे पाखे वंगु दु ।
