हत्याकाण्डयात कयाः जनकपुरय् नाकाबन्दी

येँ (सन्ध्या टाइम्स)/संचार उद्यमी नापं व्यवसायी अरुण सिंहानियायात न्हिगः बहनी म्हमसिउपिं मनूतय्सं गोलीं कयेका स्याना बी धुंकाः अपराधीतय्त मालेगु निंतिं स्थानीय प्रशासनं जनकपुरयात म्हिगः बहनी निसें हे थौं तक नं नाकाबन्दी यानातःगु दु। म्हिगःनिसें नाकाबन्दी यानातःगु जूसां अपराधीत धाःसा आः तक नं छम्ह हे ज्वनेफुगु मदुनि। संचार उद्यमी सिंहानिया सीम्ह अनया केयर अस्पतालय् तयातःगु दुसा अस्पतालय् एमालेया नेता रामचन्द्र झा नापं मेमेपिं सभासद व सर्वसाधारण मनूत नापं संचारकर्मीत थौं सुथंनिसें हे मुनाच्वंगु दु। जनकपुर टुडे प्रकाशन पुचःया नायः ५० दँ दुम्ह वय्कःयात म्हिगः बहनी ६ बजे गोलीं कयेकाः स्याना बिउगु खः। मारवाडी सेवा समिति जनकपुरया नायः तकं जुयादीम्ह वय्कः छेँय् लिहां वनाच्वंगु इलय् म्हमसिउपिं मनूतय्सं गोलीं कयेकाः स्याना बिउगु खः। उगु घटनायात कयाः संचारकर्मी नापं उद्यमीपिंसं दोषीयात तत्काल कारवाही यायेमाःगु नापं शान्ति सुरक्षाया प्रत्याभूति यायेत माग याःगु दु। लुमंकेबहः जू उगु हे संचार संस्थाया संचारकर्मी उमा सिंहयात नं वंगु पुष २७ गते स्याना बिउगु खः ।

तराई जनतान्त्रिक पार्टीं जिम्मा काल
येँ (सन्ध्या टाइम्स)/संचार उद्यमी अरुण सिंहानियाया हत्याया जिम्मा तराईलय् भूमिगत रुपं सक्रिय तराई जनतान्त्रिक पार्टी मधेसं काःगु दु ।

जनकपरय् क्रियाशिल जुयाच्वंपिं संचारकर्मीतय्त वंगु चान्हय् हे फोन यानाः उगु पार्टीया कार्यकर्तातय्सं सिंहानियात थःपिंसं स्यानागु खः धकाः जिम्मेवारी काःगु खः। तर वय्कःयात छाय् स्यानागु खः धइगु न्ह्यसःया लिसः धाःसा उमिसं मबिउगु खँ सञ्चारकर्मीतय्सं धाःगु दु ।

स्वतस्फूर्त रुपं जनकपुर बन्द
येँ (सन्ध्या टाइम्स)/संचार उद्यमी नापं व्यवसायी अरुण सिंहानियायात स्याना बिउगु घटनां यानाः थौं जनकपुरय् स्वतस्फूर्त रुपं सुथंनिसें हे बजाः बन्द जूगु दु। थौं सुथंनिसें हे अन यातायात बन्द जुयाच्वंगु दुसा यातायात व बजाः बन्द जुयाः पूरा लागा हे सुनसान खने दयाच्वंगु दु। जनकपुरय् छगू कथं आतंक हे ब्वलनाच्वंगु कारणं मनूत तसकं ग्यानाच्वंगु अवस्था ब्वलंगु दु। गनं छुं जुइ ला धकाः मनूत पिहां वने हे ग्यानाच्वंगु दु। थाय्थासय् प्रहरी परिचालन यानातःगु दु। म्हिगः बहनीनिसें अन वहे हत्या काण्डयात कयाः जक मनूतय् दथुइ खँ जुयाच्वंगु दु ।