नेवाः व तामाङ स्वापू बारे सहलह
यल (सन्ध्या टाइम्स)/देशय् लागू जुइत्यंगु संघीय व्यवस्थाय् नेवाः व तामांग लागा दथुइ छु गज्याःगु स्वापू कायम जुइमाः धइगु खँयात कयाः ललितपुर नागरिक समाज व कवि क्याफेया ग्वसालय् थन छगू सहलह मुँज्या जुल ।
ज्याझ्वलय् न्ववासें तामाङ जातीय आन्दोलनकर्मी कुमार योन्जनं स्वनिगः धइगु नेवाः व तामाङ निगुलिं जातिया आदिभूमि जूगु कारणं थुकिया बारे निर्णय यायेबलय् उत्तेजित जुइ मजिउ धयादिल। लिसें थ्व सवालय् गनं समस्या दुसा नापं च्वनाः ज्यंकेमाः धयादिल ।
मेम्ह तामाङ बुद्धिजीवी अजितमान तामाङं स्वनिगलय् नेवाः व तामाङ नापनापं च्वना वःगु खःसां नेवाः ति तामाङ जाति विकसित जुइ मफुत उकिं निगुलिंया पहिचान कायम यानाः न्ह्याः वनेमाः धयादिल ।
नेवाः बुद्धिजीवी लक्ष्मण राजवंशीं नेवाः व तामाङया सीमा बारे आः पिहां वयाच्वंगु विवादयात सुं मेपिंपाखें मखुसें नेवाः व तामाङया हे मंकाः अध्ययन समिति दयेकाः ज्यंकेमाः धयादिल। लिसें वय्कलं संघीय व्यवस्था जनजातिया लागिं जीवन मरणया सवाल खःसां पार्टीतय् लागिं रणनीतिक पलाः जक जुइफु उकिं उकी नं सतर्क जुइमाः धयादिल ।
नेपाः राष्ट्रिय पार्टीया सभासद् बुद्ध साय्मिं आः प्रस्ताव याःगु १४ प्रदेश उत्पीडित जातियात बिउगु खः धासें तर राज्य दयेकूबलय् राजनीतियात जक अप्वः ध्यान बिल अन दुगु स्रोत साधनयात माक्व ध्यान मबिल धयादिल ।
नेवाः जातीय आन्दोलनकर्मी डा. महेशमान श्रेष्ठं नेवाःया दुश्मन तामाङ व तामाङया दुश्मन नेवाः खः लाकि निगुलिंया दुश्मन मेम्ह हे सुं दु उकियापाखे झीगु ध्यान वनेमाः धयादिल। वय्कलं स्वनिगःयात खुल्ला यायेगु धइगु थनया नेवाःतय् अस्तित्व हे तंकेगु खः धासें प्रस्तावित १४ प्रदेशयात समर्थन यासें उकी मगाः मचाःगु खँ कायेगुपाखे स्वयेमाः धयादिल ।
नेवाः मिसा न्ह्यलुवा डा. चुन्दा वज्राचार्यं तामाङ व नेवाःत अप्वः यानाः बौद्ध धर्मावलम्बी जूगुलिं निगुलिंया मंकाः धार्मिक स्थलत आपालं दु धयादिल। कुलेखानी लागाय् आः तक नं नेवाःतय् बलामी व तामाङ निगू जाति जानाः मंकाः रुपं न्यायेके माःगु जात्रात अझ नं दनि धासें थ्व निगुलिंया अस्तित्व रक्षा जुइकथंया नीति दयेकाः वनेमाःगु बिचाः प्वंकादिल ।
ललितपुर नागरिक अभियानपाखें शाक्य सुरेनं नेवाः व तामाङ स्वापू बारे थौं नेवाःतय्सं सःताः सहलह ब्याकू थें लिपा तामाङतय्सं नं सःताः सहलह ब्याकेमाः धयादिलसा उकियात तामाङ सहभागीतय्सं सकारात्मक रुपं कयादीगु खः। ज्याझ्वलय् कृष्ण कोजु, मदन तण्डुकारपिंसं नं बिचाः प्वंकादीगु दु ।
