प्रम व गृहयाके स्पष्टीकरण
येँ (सन्ध्या टाइम्स)/व्यवस्थापिका संसदया राज्य व्यवस्था समितिं प्रधानमन्त्री व गृहमन्त्रीयाके शान्ति सुरक्षा व सरकारया अनियमितताया विषयय् थौं स्पष्टीकरण काइगु जूगु दु। प्रधानमन्त्री माधवकुमार नेपालयाके ताः ई न्ह्यवंनिसें संवैधानिक निकायया पदाधिकारी नियुक्त याये मफुगु कारणं सरकारी ज्या प्रभावकारी मजूगु विषययात कयाः जानकारी काइगु खँ धाःगु दु। अख्तियार दुरुपयोग आयोग, निर्वाचन आयोग, राष्ट्रिय मानवअधिकार आयोग, महालेखा परीक्षकनापं संवैधानिक पदाधिकारीत थौंकन्हय् खाली जुयाच्वंगु दु। उकिया निंतिं प्रधानमन्त्रीयात ३ बजे सःतातःगु दु। अथे हे शान्ति सुरक्षायात कयाः गृहमन्त्रीयात नं थौं हे सःतातःगु दु ।
