कामु गभर्नर मानन्धरयात हना
येँ (सन्ध्या टाइम्स)/न्यागमणि फेदि मानन्धर संघया नीस्वक्वःगु तःमुँज्या वंगु शनिवाः ल्हुति स्थित बाइसधारा उद्यान दुने थःगु हे भवनय् जुल। नासः पुजा नापं प्याःथ्वँ अजिमाया पुजा यासें त्वाःया कजि पद्मलाल मानन्धरया सभापतित्वय् जूगु उगु ज्याझ्वःया उलेज्या मूपाहां नेपाल राष्ट्र बैंकया का.मु गभर्नर कृष्णबहादुर मानन्धरं त्वाःदेवा च्याकाः यानादीगु खः ।
संघया सल्लाहकार लक्ष्मीदास मानन्धरं लसकुस यानादीगु तःमुँज्याया न्हापांगु ब्वय् केन्द्रीय मानन्धर संघया सभापति न्हुछेबहादुर मानन्धर, उपसभापति रत्ननारायण न्हूजवाः साय्मि, सभासदपिं डा. मंगलसिद्धि मानन्धर व बुद्ध साय्मि, पुलांम्ह उपसभापति पंचकुमारी मानन्धर, इमेज च्यानलया महा प्रबन्धक रघुवरभक्त मानन्धरपिंसं न्ववानादीगु खः।
ज्याझ्वलय् मूपाहां का.मु गभर्नर मानन्धरयात संघपाखें हनेज्या नं जूगु खः। वय्कःयात सल्लाहकार रामभक्त मानन्धरं दोसल्लां न्ययेकाः व कजि पद्मलाल मानन्धरं हनापौ देछानादीगु खः। निगूगु सत्रय् छ्याञ्जे श्यामकृष्ण मानन्धरं वार्षिक व दांभरिं लक्ष्मीनारायण मानन्धरं आर्थिक प्रतिवेदन न्ह्यब्वयादीगु खः ।
