शेयर कारोबार सुचारु
येँ (सन्ध्या टाइम्स)/वंगु छवाः न्ह्यःनिसें ठप्प जुयाच्वंगु शेयर कारोबार म्हिगःनिसें हाकनं न्ह्याःगु जूगु दु। वंगु वाःया सोमवाःनिसें ठप्प जुयाच्वंगु शेयर कारोबार लगानीकर्तातय् मागय् सरकार संबोधन यायेत सहमत जुइवं म्हिगःनिसें कारोबार हाकनं न्ह्याःगु खः ।
शेयर बजारय् खनेदुगु समस्या व लगानीकर्तातय्सं फयेमालाच्वंगु समस्याय् सरकारी नियमनकारी निकायं छुं हे वास्ता मयाःगु धासें शेयर बजाःया लगानीकर्तातय् स्वंगू संगठन कारोबार ठप्प यानाः मंकाः आन्दोलनया घोषणा याःगु खः ।
लगानीकर्तासें न्ह्यब्वःगु नीनिगु बुँदाया मागयात कयाः अर्थ मन्त्रालयं नेपाल स्टक एक्सचेन्ज (नेप्से), नेपाल राष्ट्र बैंक, नेपाल धितोपत्र बोर्ड, लगानीकर्तातय् स्वंगुलिं संगठन व कम्पनी रजिष्ट्रारया प्रतिनिधि सहितया मुँज्या च्वनाः सहलह ब्याकूगु खः ।
सहलह लिपा सरकारं थःपिनिगु मागयात संबोधन यायेगु प्रतिवद्धता प्वंकेवं स्वंगुलिं संगठनं थःपिनिगु आन्दोलन दिकाः बजाः सुचारु यायेत सहमत जूगु खः। शेयर लगानीकर्तातय् आन्दोलनया कारणं इतिहासय् न्हापांखुसी नेप्सेय् छवाःतक कारोबार ठप्प जूगु खः ।
