अपराधी ज्वनेत सरकार क्रियाशिल : पोखरेल

सचूना व संचार मन्त्री शंकर पोखरेलं संचार उद्यमी अरुण सिंहानियाया हत्यारा ज्वनेत सरकार क्रियाशिल जूगु खँ धयादीगु दु ।

सरकारया प्रवक्ता नं जुयादीम्ह मन्त्री पोखरेलं मंगलवाः छगू विज्ञप्ति पिथनादिसें सिंहानियाया हत्याय् संलग्न अपराधि व अपराधिक पुचःयात अबिलम्ब ज्वनेत संचार मन्त्रालयं गृहमन्त्रालयनाप समन्वय यानाच्वंगु धयादिल ।

संचारकर्मीतय्त जुयाच्वंगु हत्याया घटनाप्रति सरकार संवेदनशील जूगु न्ह्यथंनादिसें मन्त्री पोखरेलं घटनाय् संलग्न अपराधीयात कानुनया दायराय् हयाः कारवाही यायेत सरकार प्रतिबद्ध जूगु धयादिल । विज्ञप्तिइ सिंहानियाया हत्याया घटनां सरकार स्तब्ध जूगु धासें उकी भर्त्सना नं यानादीगु दु ।