औद्योगिक सुरक्षाबल स्थापना यायेत माग
निजी क्षेत्रं औद्योगिक क्षेत्रया सुरक्षा व्यवस्थाया निंतिं लछिया दुने औद्योगिक सुरक्षाबल स्थापना यायेत सरकार नाप माग याःगु दु ।
मंगलवाः नेपाल उद्योग वाणिज्य महासंघ व नेपाल चेम्ब अफ कमर्सया पदाधिकारीतय्सं प्रधानमन्त्री माधवकुमार नेपालयात नापलाना तत्काल मन्त्रिपरिषदया बैठक च्वनाः लछिया दुने औद्योगिक सुरक्षाबल लागु यायेत माग याःगु दु । उगु इलय् प्रधानमन्त्री नेपालं व्यवसायीतय् मागया बारे थःम्हं फक्वः कुतः यायेगु धयादिसें औद्योगिक सुरक्षाबल लागु यायेगु प्रतिवद्धता प्वंकादिल ।
व्यवसायीतय्सं औद्योगिक क्षेत्रय् सुरक्षाया अभावं ज्या यायेगु वातावरण मदयावनाच्वंगु न्ह्यथंसें चैत्र १८ गते दुने सुरक्षा व्यवस्थाय् सुधार मवासाः थःपिं उद्योग बन्द यानाः च्वनीगु ख्याच्वं नं ब्यूगु खः । नापं व्यवसायीतय्सं अर्थतन्त्रय् संकट वःगु इलय् गभर्नर नियुक्ति प्रक्रिया इलय् हे यायेत नं सरकारयात इनाप याःगु खः । प्रधानमन्त्री व व्यवसायीत दथुइया खँल्हाबंलाय् अर्थमन्त्री सुरेन्द्र पाण्डेया नं उपस्थिति दुगु खः ।
