थीथी स्वंगू सशस्त्र पुचलं सिंहानियाया हत्याया जिम्मेवारी
संचारी उद्यमी अरुण सिंहानियाया हत्याया जिम्मा थीथी स्वंगू सशस्त्र पुचलं काःगु दु । उमिसं तराईया स्थानीय संचारकर्मीतय्त फोन यानाः सिंहानियाया हत्या थःपिनिगु पुचलं काःगु दाबी याःगु दु ।
मंगलवाः नेपाल पत्रकार महासंघया धनुषा व महोत्तरी शाखाया मंकाः बैठक जुयाच्वंगु इलय् बैठकय् उपस्थित संचारकर्मीतय्त फोन यानाः तराई जनतान्त्रिक मधेस पार्टीया केन्द्रीय अध्यक्ष अजयसिंहं हत्यया जिम्मेवारी काःगु दु । अजयिसंहं संचार माध्यमं मधेस आन्दोलनयात बदनाम याःगु, नक्कली सशस्त्र पुचःयात प्राथमिकता ब्यूगु, मधेशीतय् मनोवल क्वःकाःगु लगायत द्वपं नं ब्यूगु दु ।
अथेहे जनतान्त्रिक तराई मुक्ति मोर्चा (राजन पुच) व तराई आर्मी नं स्थानीय संचारकर्मीतय्त फोन यानाः घटनाय् थःगु पुचया ल्हा: दुगु धासें जिम्मेवारी काःगु दु ।
संचार उद्यमी सिंहानियायात सोमवाः सनिलय् मोटरसाइकलय् वम्ह अज्ञात बन्दुधारीं स्वंगः गोलीं क्येकाः स्याःगु खः । हत्या लिपाः मंगलवाः जनकपुरया बजाः बन्द जुयाच्वंगु दुसाः सवारी साधन नं चलेजूगु मदु ।
