संविधान दयेके मफुगु गलः सुयात घाकेगु?
येँ (सन्ध्या टाइम्स)/संविधान जारी यायेगु ई सतिना वःलिसे आः सुनां यानाः संविधान दयेके मफुत धइगु खँ न्ह्यःने तयाः संविधान निर्माण याये मफुगुया गलः सुयात घाकेगु धकाः प्रमुख दलतय्सं गृहकार्य यानाहःगु दु ।
संविधान निर्माणया निंतिं दलतय् दथुइ यक्व हे खँय् सहमति ब्वलंके मफयाच्वंगु अवस्थाय् लिपांगु इलय् वयाः छगू कथं 'सत्ता मोह हे क्यनाच्वंगु' एनेकपा (माओवादी) यात हे थ्व गलः घाकेगु तयारी नेपाली कांग्रेस व नेकपा (एमाले)या नेतातय्सं यानाहःगु दु। कांग्रेस व एमालेया नेतातय् दथुइ सहलह ब्याकाः शर्त सहित माओवादीया नेतृत्वय् सरकार दयेकेगु धकाः खँ ल्हानाहःगु दु। 'माओवादीं विश्वासया लकस ब्वलंकेमाःगु, वाइसीएलया अर्धसैन्य संरचना खारेज यायेमाःगु, कब्जा यानातःगु सम्पत्ति लित बीमाःगु, लोकतान्त्रिक संविधान दयेकेमाःगु' सर्त न्ह्यःने तःगु दु। न्हापा हे यानातःगु सहमतियात शर्तया रुपय् तःगु दु व धइगु क्यनेगु निंतिं जक खः वास्तवय् संविधान निर्माणया निंतिं मखु धकाः नागरिक आन्दोलनया न्ह्यलुवाः श्याम श्रेष्ठं धयादीगु दु। संविधान निर्माणया नितिं यायेमाःगु सहमतियात वेवास्ता यानाः आः सरकार परिवर्तनया जक खँ गुगु कथं कांग्रेस व एमालेया नेतातय्सं हल वास्तवय् थ्व संविधान निर्माणया निंतिं धकाः तायेके मजिउगु खँ नं वय्कलं 'सन्ध्या टाइम्स' यात खँ ल्हासें थःगु बिचाः प्वंकादीगु दु ।
यक्व खँय् मूमू राजनीतिक दलया दथुइ संविधान निर्माण यायेत ब्वलंकेमाःगु सहमतियात वास्ता मयासे सरकार परिवर्तन यानाः माओवादीया नेतृत्वय् सरकार दु धकाः क्यनाः संविधान दयेकेगुली पंगः थन धाःसा वहे माओवादीया निंतिं गलः जुइ धइगु तायेकाः कांग्रेस व एमालेया नेतात उगु गृहकार्यय् वंगु खयेमाः धकाः तकं मनूतय्सं तायेका हःगु दु। तर माओवादीं थुकियात गुगु कथं काइ व धाःसा स्वयेगु ल्यं हे दनि ।
येँ (सन्ध्या टाइम्स)/राजनीतिक गतिरोध अन्त्यया निंतिं धकाः नेपाली कांग्रेसया सभापति गिरिजाप्रसाद कोइरालाया नेतृत्वय् नीस्वंगु उच्चस्तरीय संयन्त्रया मुँज्या कन्हय् च्वनीगु जूगु दु। एनेकपा (माओवादी)या अध्यक्ष प्रचण्ड व नेकपा (एमाले)या अध्यक्ष झलनाथ खनाल दुजः कथं दुथ्याःगु उगु संयन्त्रया मुँज्या कन्हय् छगू होटलय् च्वनाः राजीतिक सहमतिया प्याकेजया विषययात कयाः हे सहलह ब्याकेगु तयारी यानाच्वंगु दु धकाः छम्ह नेतां 'सन्ध्या टाइम्स' यात कनादीगु दु। आः तक च्वंगु संयन्त्रया मुँज्यां छुं हे खँय् सहमति कायम याये फुगु मदुन
