एल्भीसया खुक्वःगु पुण्यतिथि

येँ (सन्ध्या टाइम्स)/नेपालभाषा न्हिपौ 'सन्ध्या टाइम्स'या उपसम्पादक एल्भीस जोशी मदुगु थुगुसीया होलिपुन्हि कुन्हु न्यादँ फुनाः खुदँय् क्यनेत्यंगु दु। वय्कः ने.सं. ११२४ या होलिपुन्हि कुन्हु पलिं कुतुं वनाः मत्यवं मदुगु खः।
वय्कःया लुमंतिइ नीस्वनातःगु एल्भीस जोशी लुमंति धुकूपाखें थुगुसी नेपालभाषा एम.ए. निगूगु दँया लागिं च्वयाच्वंगु छगू शोधग्रन्थयात लघु विद्वतवृत्ति बीगु जूगु दु। नेपालभाषा केन्द्रीय विभागया विद्यार्थीतय् संस्था लुमंति दबू मार्फत धुकूपाखें थ्व विद्वतवृत्ति बीत्यंगु खः। थुगुसी झिंन्याम्ह विद्यार्थीतय्सं शोधग्रन्थ च्वयाच्वंगु दुसा उकी मध्ये छगूयात ल्ययाः थ्व विद्वतवृत्ति बीगु खँ धाःगु दु ।