विमानस्थल सुधारया निंतिं निर्देशन
येँ (सन्ध्या टाइम्स)/पर्यटन तथा नागरिक उड्डयन मन्त्री शरदसिंह भण्डारीं स्वलाया दुने त्रिभुवन अन्तर्राष्ट्रिय विमानस्थलया पूर्वाधार सुधार यायेत निर्देशन बियादीगु दु। मन्त्री भण्डारी विमानस्थल निरीक्षण लिपा उगु निर्देशन बियादीगु खः ।
विमानस्थलया पूर्वाधार सुधारया निंतिं पर्यटन विभाग व सम्बन्धित कर्मचारीतय्त लगे जुइगु निंतिं मन्त्री भण्डारीं निर्देशन बियादीगु खः। पर्यटन वर्ष-२०११या दुने सरकारं झिगू लख पर्यटक दुकायेगु लक्ष्य कयातःकथं उकिया वातावरण दयेकेगु निंतिं सुधारया आवश्यकता दुगु नं वय्कलं कनादीगु दु ।
थौंकन्हय् नेपाः दुहां वइपिं कूल पर्यटक मध्ये अन्तर्राष्ट्रिय विमानस्थल पाखें झिगू प्रतिशत जक पर्यटक दुहां वयाच्वंगु दु। पर्यटन वर्ष दुने सरकारं काःगु लक्ष्य कथं पर्यटक दुकायेगु निंतिं देय्या छगू जक अन्तर्राष्ट्रिय विमानस्थल सुधारया निंतिं सकलें गम्भिर रुपं लगे जुइमाःगु नं मन्त्री भण्डारीं धयादीगु दु ।
उगु इलय् मन्त्री भण्डारीं मुक्कं विमानस्थलया संरचनाया निरीक्षण नं यानादीगु खः ।
