एमाले कार्यकर्तातय्सं आतंक ब्वलंकाच्वंगु माओवादीया द्वपं
गृहप्रशासनया संरक्षणय् नेकपा (एमाले)या कार्यकर्तातय्सं देय्न्यंक आतंक ब्वलंकाच्वंगु द्वपं ब्यूसें एनेकपा (माओवादीं) उकीया विरोध व प्रतिरोधया निंतिं इनाप याःगु दु । सोमवाः पार्टी प्रवक्ता दिनानाथ शर्मां छगू विज्ञप्ति पिथनादिसें एमाले व सम्बद्ध पक्षयात जिम्मेवार जुइत नं इनाप याःगु दु । नापं विज्ञप्तिइ सरकारं नागरिकतय् सुरक्षा यायेमफुगु द्पवं नं बियात:गु दु ।
माओवादीं एमालेया युथफोर्सं साउन लिपाः जक छगू दर्जन स्वयां अप्वः थ:गु पार्टीया कार्यकर्तातय् हत्या याये धुंकूगु खँ न्ह्यथंसें वंगु आइतवाः सुर्खेतया सहारेय् वाईसीएल कार्यकर्ता आशाराम विकयात स्याःगु व हिरा विक, खिमबहादुर वली व सेतीराम सुनारयात गम्भीर घाःपाः याःगु द्वपं ब्यूगु दु ।
अथेहे विज्ञप्तिइ बारा, मकवानपुर, धनुषा, ताप्लेजुङ, धादिङ लगायत थासय् युथफोर्सं माओवादी कार्यकर्तातय्त आक्रमण याःगु व देशय् आतकं ब्वलंकूगु धासें थुकीया प्रतिरोध व विरोद्ध यायेत इनाप याःगु दु ।
