भारतीय नेता यचुरीं राष्ट्रपति यादव नापलात
नेपाःया लिप्पांगु राजनीतिक अवस्थाया बारे जानकारी कायेत आइतवाः नेपाः झायादीम्ह भारतीय माक्र्सवादी पार्टीया वरिष्ठ पोलिटब्यूरो दुजः सीताराम यचुरीं सोमवा राष्ट्रपति डा. रामवरण यादवनाप खँल्हाबंला यानादीगु दु । राष्ट्रपति नाप वय्कलं शान्ति प्रकृया, संविधान निर्माण व नेपाःया समसामयिक व राजनीतिक घटनाक्रमया बारे खँल्हाबंला यानादीगु खः ।
सोमवाः हे वय्कलं माओवादी अन्तर्राष्ट्रिय विभाग प्रमुख कृष्णबहादुर महरा नाप नं खँल्हाबंला यानादीगु दु । होटल र्याडिसनय् जूगु खँल्हाबंलाय् शान्ति प्रकृया, सेना समायोजन व विशेष यानाः राजनीतिक गतिरोधया बारे खँल्हाबंला जूगु खः ।
स्वन्हुन्यंकया भ्रमणया झ्वलय् वय्कलं प्रधानमन्त्री माधवकुमार नेपाल, कांग्रेस सभापति गिरिजाप्रसाद कोइराला, माओवादी अध्यक्ष पुष्पकमल दाहाल 'प्रचण्ड', एमाले अध्यक्ष झलनाथ खनाल लगायत नेतातय्त नापलानादीगु ज्याझ्वः दु । नापं वय्कलं अनमित प्रमुख करिन ल्यानग्रेननाप नं खँल्हाबंला यानादीगु ज्याझ्वः दु ।
वर्तमान राजनीतिक गतिरोध अन्त्य यायेत दलत असफल जुयाच्वंगु इलय् नेपाः थ्यंक वःगुलिं यचुरीया भ्रमणयात नेपाःया राजनीतिइ महत्वया साथ स्वयाच्वंगु दु ।
