फागु पुन्हि न्यायेकल / जबर्जस्ती याःपिं २९३म्हेसित ज्वन

अविर व रंगया नखः फागुपुन्हि आइतवाः स्वनिगः नापं पहाडी क्षेत्र व हिमाली क्षेत्रय् आपसी मेलमिलाप व सद्धभावनाया सन्देश सहित न्योकूगु दु । तराइ लागाय् धाःसाः फागु पुन्हिया कन्हय् कुन्हु जक होलि न्यायेकेगु याः ।

चिल्लाथ्व अष्टमिइ येँया बसन्तपुली चीर स्वासांनिसें सुरु जूगु थ्व नखःया थौं मू न्हि खः । थौं सुथं निसें नेपाःमित अबिर, रंग व लखं व्छाकाः फागु न्यायेकूगु खः । फागुया मू न्हि जूगुलिं थौं म्हो जक पसः चागू खःसा सतकय् फागु म्हितिपिनि मोटरसाइकल बाहेक मेमेगू सवारी साधन नं चलेमजू । थौ सरकारं सार्वजनिक बिदा बियातःगुलिं ज्याकू व शिक्षण संस्थात बन्द जूगु खः ।

होलि म्हितेगु झ्वलय् मेपिंतं जबर्जस्ती रंग व लखं व्छाकूगु अभियोगय् प्रहरीं २९३ म्हेसित स्वनिगःया थीथी थासं ज्वंगु दु । प्रहरीं येँ नं २७७ जवान व यलं १६ जवनं ज्वनायंकूगु खः । ज्वना यंकूपिं दक्वसितं आइतवाः बहनी हे त्वःतुगु खँ प्रहरीं धाःगु दु ।

अथेहे प्रहरीं होलिया न्हिइ ट्राफिक नियम उल्लंघन याःगु अभियोगय् २५२ मोटरसाइकलयात नियन्त्रणय् काःगु दु । प्रहरीं येँ नं २४१ व यलं ११ मोटरसाइकल नियन्त्रणय् काःगु खः ।