'संविधानसाभाया म्याद तनेगु अधिकार सुयातं मदु'

पर्यटन व नागरिक उड्डयनमन्त्री शरदिसंह भण्डारीं संविधानसभाया म्याद तनेगु अधिकार सुयातं मदुगु खँ धयादीगु दु ।

आइतवाः येँ जूगु छगू ज्याझ्वलय् न्ववानादिसें वय्कलं देशय् स्थायित्व कायम यायेगु जिम्मा राजनीतिक दलतय् जूगु धयादिसें उकीया निंतिं दलत दथुइ विश्वासया वातावरण अप्वयेकाः सहकार्य व समझदारी यानाः न्ह्याः वनेमाःगु खँय् बः बियादिल ।

वय्कलं अप्रत्यासित राजनीतिक दुर्घटनां देय्यात जोगे यायेत माओवादी लडाकुया व्यवस्थापनया नापं इलय् हे संविधान जारी यायेगु प्रकृयायाय् न्ह्या वनेमाः धयादिल । वय्कलं राष्ट्रिय सेनाया मापदण्ड कथं जक माओवादी लडाकुयात नेपाली सेनाय् समायोजन यायेफइगु बिचाः प्वंकादिल ।