चिलीइ नीच्यादँया दलकय् तःधंगु भुखाय्
दक्षिण अमेरिकी देय् चिलीइ नीच्यादँया हे दकलय् तःधंगु भुखाय् ब्वःगु दु । अन ८.८ रेक्टरस्केलया भुखाय् ब्वःगु व उकीं तःधंगु सुनामि वयाः तःधंगु ल्यख्य् जनधनया क्षति जूगु दु । चिलीया सरकारं आः तक न्हय्च्याम्ह सिधुंकूगु व सीपिनि ल्याः अझ अप्वयेफुगु खँ धाःगु दु ।
८.८ रेक्टरस्केलया भुखाय् लिपाः आपालं मनूत दुगु रोबिन्सन क्रुसो आइल्याण्डय् तःधंगु सुनामि वःगु खः । आः अन सुनामिया खतराया सूचं पिथंगु दु । अथेहे हवाई, अष्ट्रेलिया, न्यूजिल्याण्ड, जापान, फिलिपिन्स, रुस लगायतय् नं सुनामि वयेफुगु खतराया सूचं पिथंगु दु ।
राजधानी सान्डिआगो पाखें निसः किलोमिटर दक्षिण पश्चिमय् वंगु भुखाय्या कारणं आः अनया विद्युत आपूर्ति बन्द जूगु दुसा फोन सेवा नं संचालनय् वयेमफगु खँ धाःगु दु । भुखाय्या प्रभाव अर्जेन्टिना तकं महसुश याःगु खः ।
थ्वस्वयां न्ह्यः दकलय् तःधंगु भुखाय् वहे थासय् २२ मे १९६०लय् वंगु खः । उकी लानाः १६५५ मनू सीगु खःसा नीगू लख मनूत घारवार विहीन जूगु खः । उकी लिपाः वःगु सुनामिं हवाई, जापान व फिलिपिन्सय् नं मनूत सीगु खः ।
