'इलय् हे संविधान निर्माण यायेगु खँ दलतय् गतिविधिलय् निर्भर'

संविधानसभाया अध्यक्ष सुवासचन्द्र नेम्वाङं इलय् हे संविधान निर्माण यायेत दक्वं राजनीतिक दलत छप्पं जुइमाःगु खँय् बः बियादीगु दु ।

पोखराया मझेरीपाटनय् च्वंगु रामेश्वरी माध्यमिक विद्यालयया न्हूगु भवनया शनिवाः उल्लेज्या यानादिसें वय्कलं इलय् हे संविधान निर्माण जुइगु वा मजुइगु धइगु खँ दलतय् गतिविधिलय् निर्भर जुइगु धयादिल । वय्कलं दलत छप्पं जुयाः न्ह्याः वंसाः इलय् हे संविधान जारी जुइगुलिं दक्वं राजनीतिक दलतय्त छप्पं जुइत इनाप नं यानादिल ।

अथेहे वय्कलं संविधान च्वयेगुया आधार तयार जुइधुंकूगुलिं मेमेगू ज्याखँ त्वःताः संविधान निर्माण यायेगु पाखे सम्वेदनशील जुइत व संविधान निर्माण यात हे प्राथमिकता बीत नं राजनीतिक दलतय्त इनाप यानादिल ।