दलत दथुइ सहमति आवश्यक : प्रधानमन्त्री
प्रधानमन्त्री माधवकुमार नेपालं संविधान निर्माण व शान्ति प्रकृयायात सार्थक निष्कर्षय् थ्यंकेत दलत दथुइ मंकाः सहमति आवश्यक जूगु खँ धयादीगु दु ।
येँ शनिवाः निसें सुरु जूगु एसियाली राजनीतिक दलतय् अन्तर्राष्ट्रिय सम्मेलनया झिंनिक्वःगु स्थायी समितिया बैठकया उल्लेज्या यानादिसें प्रधानमन्त्री नेपालं एकता, संवाद व सहकार्य पाखें दक्वं समस्याया समाधन यायेत सरकार कृयाशिल जूगु धयादिल ।
वय्कलं संविधान निर्माण व शान्ति प्रकृया आःया मू एजेण्डा जूगुलिं थुकी दक्वं राजनीतिक दलत छप्पँ जुइमाःगु बिचाः प्वंकादिल । अथेहे वय्कलं दलत दथुइ राजनीतिक गतिरोध अन्त्यया निंतिं कुत: जारी जूगु धयादिसें याकनं हे गतिरोध अन्त्य जुइगु विश्वास प्वंकादिल ।
नेपाः सहित एसियाया झिंन्हय्गू देय्या न्यय्निगू दलया प्रतिनिधित दुथ्याःगु सम्मेलनय् प्रधानमन्त्री नेपालं माओवादी शिविरं अयोग्य लडाकुतय् बहिर्गमन यायेफुगु सरकारया तःधंगु उपलब्धी जूगु व थ्व शान्ति प्रकृयाया छगू महत्वपूर्ण पलाः जूगु धयादिल ।
