भारतं हे पासपोर्ट छापेजुइ : कोइराला
उपप्रधान नपां परराष्ट्रमन्त्री सुजात कोइरालां छुं नं हालतं मेसिन रिडेवल पासपोर्ट (एमआरपी) भारतं हे छापे यायेगु खँ धयादीगु दु । एमआरपी छापे यायेगु सम्बन्धी अनियमितता जुइत्यंगु आशंकाय् व्यवस्थापिका संसदया सार्वजनिक लेखा समितिं तत्काल उगु प्रकृया दिकेत निर्देशन बिधुंकूसां परराष्ट्रमन्त्री कोइरालां उगु प्रकृयायात निरन्तरता ब्यादिसें भारतं हे छापे यायेगु अडान कयादीगु दु ।
शनिवाः येँ जूगु छगू साक्षात्कार ज्याझ्वलय् न्ववनादिसें वय्कलं लेखा समितिलय् अप्रजातान्त्रिक मनूत दुथ्याःगु धयादिसें समितिं राष्ट्र हितया पक्षय् ज्या यायेमफइगु द्वपं बियादिल । वय्कलं मन्त्रिपरिषदया बैठकं भारतय् पासपोर्ट छापे मयायेत निर्देशन मब्यूगु धयादिसें निगूलिं देय्या सरकारी स्तरं उगु प्रक्रिया न्ह्यने यंकेगु धयादिल ।
अथेहे वय्कलं सरकारया मुख्य सचिवं प्रतिस्पर्धाय् दुगु मेमेगू कम्पनीया प्रस्ताव मन्त्रिपरिषदय् दर्ता मयाकूगुलिं उकीया बारे सहलह यायेमफुगु दाबी यानादिल । वंगु बुधवाः च्वंगु मन्त्रिपरिषदया बैठकं भारतय् हे एमआरपी पासपोर्ट छापे याकेमाःगु परराष्ट्रमन्त्रीया प्रस्ताव सहलह हे मयासें लितछ्वःगु खःसां प्रतिस्पर्धाया आधारय् मेमेगू कम्पनीयात पासपोर्ट छापे याकेगू वा भारतय् हे याकूगु विषय धा:सा: स्पष्ट मयाः ।
