लिप्पांगु विद्रोह आवश्यक : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' जनताया न्हूगु संविधान निर्माण यायेत अन्तिम विद्रोह आवश्यक जूगु खँ धयादीगु दु । वय्कलं जनताया मतया उपेक्षा यानाः माओवादीयात याकचाः दयेकेत स्वःसाः वर्तमान शासक विरुद्ध लिप्पांगु विद्रोह ख्याच्व: बियादिल ।
शुक्रवाः दमौलीइ माओवादी जिल्ला कार्यसमिति पाखें दयेकूगु सहिद स्मृति धोखाया उल्लेज्या यानादिसें वय्कलं विदेशीतय् ईशाराय् शान्ति प्रकृयाया व संविधान निर्माण प्रकृया स्यंकेगु कुतः जुयाच्वंगु द्वपं बियादिल । वय्कलं वर्तमान मन्त्रीतय् खँ व भारतीय सेनापतिया धापू छगू हे जूगु संयोग जक मखसें थ्व माओवादी व शान्ति प्रकृया विरुद्धया षड्यन्त्र जूगु दाबी यानादिल ।
प्रचण्डं शान्तिपूर्ण नेपाःया हितया निंतिं न्हूगु संविधान दयेकेगू जिम्मा नेपाःमिया ल्हातय् जूगु धयादिसें नेपाली जनताया प्रतिनिधि माओवादी जक जूगु दाबी यानादिल । माओवादी नेतृत्वया सरकार बिना न्हूगु संविधान सम्भव मजूगु नं वय्कलं धयादिल ।
