जनजाति सभासदतय्त रोष्टम घेराउ यायेत इनाप
येँ (सन्ध्या टाइम्स)/आदिवासी जनजाति वृहत्त मोर्चा नेपालं आदिवासी जनजाति संविधान सभाया सभासदसभा 'ककस' यात संविधानसभाया रोष्टम नापं व्यवस्थापिका संसद घेराउ यायेत इनाप याःगु दु। अले संविधानसभा व संसद घेराउ यायेगु निंतिं माःगु कथं तयारी यायेगु भाला एनेकपा (माओवादी)या सभासद् सुरेश आलेमगरयात बिउगु दु ।
म्हिगः च्वंगु मोर्चाया मुँज्यां उगु कथं ककसयात इनाप यायेगु खँ क्वःछिउगु दु धकाः मोर्चाया छ्याञ्जे डा. कृष्णबहादुर भट्टचनं जानकारी बियादीगु दु। अथे हे मुँज्यां संविधानय् आत्मनिर्णयया अधिकार नापं जातीय स्वायत्तता व स्वशासनयात सुनिश्चित यायेगु निंतिं एनेकपा (माओवादी), नेपाली कांग्रेस व नेकपा (एमाले)या केन्द्रीय ज्याकुथी वनाः ज्ञापनपौ बीगु नापं पार्टीया नेतातलिसे सहलह ब्याकेगु जुइ धकाः नं क्वःछिउगु दु ।
उगु मुँज्याय् आदिवासी जनजाति वृहत् मोर्चा नेपालं न्ह्याकेगु निगूगु चरणया आन्दोलनया विषययात कयाः नं सहलह जुल। क्वःछिनातःगु ई कथं वइगु फागुन २१ गते तकया दुने न्हूगु संविधानया मस्यौदा तयार यायेमाःगु कार्यतालिकायात तकं वेवास्ता यानाः सभासद व दलत न्ह्याः वनाच्वंगु हुनिं व हे २१ गते लिपा निगूगु चरणया सडक आन्दोलन यायेगु जुइ धकाः मोर्चां धाःगु दु ।
