नेवाः लोकवार्ता कार्यशाला गोष्ठी

येँ (सन्ध्या टाइम्स)/नेपालभाषा केन्द्रीय विभागया ग्वसालय् थ्वहे वंगु चिल्लाथ्व ५, ६ व ७ स्वन्हुयंकं यलय् नेवाः लोकवार्ता विषयया कार्यशाला गोष्ठी जुल। विभागीय प्रमुख प्रा. प्रेमशान्ति तुलाधरया सभापतित्वय् न्हापांगु न्हि शुक्रवाः कुन्हु त्रिविविया शिक्षाध्यक्ष प्रा.डा. सूर्यलाल अमात्यं गोष्ठीया उलेज्या यानादिल। उलेज्याझ्वलय् मूपाहां डा. अमात्य लिसें शिक्षाविद् लक्ष्मण राजवंशी व संस्कृति मन्त्रालयया सहसचिव जलकृष्ण श्रेष्ठपिंसं नुगःखँ प्वंकादिल। थ्व कुन्हु उलेज्याझ्वः धुंकाः लक्ष्मण राजवंशीयात नायः दयेकाः रवि शाक्यं 'नेवाः लोकबाखं' व जीवनकुमार महर्जनं नेवाः 'भौतिक संस्कृति' नांगु ज्यापौ न्ह्यब्वयादिल। थ्व निगुलिं ज्यापौयात प्रा. तुलसी दिवसं टिप्पणी यानादिल। थ्व धुंकाः मेगु ब्वय् डा. सुन्दरकृष्ण जोशीया अध्यक्षताय् लेनिन शाक्यं 'नेवाः लोक जीवनय् क्वाःकासा' व श्रृति शाक्यं 'नेवाः खँत्वाः, खँभाय् व छुनाखँ' या बारे ज्यापौ न्ह्यब्वयादिल। थुगु नितां ज्यापौयात सत्यमोहन जोशीं टिप्पणी यानादिल ।

निन्हु कुन्हु शनिवाः डा. त्रिरत्न मानन्धरया अध्यक्षताय् दकलय् न्हापां रास जोशीं 'अन्धविश्वास, लोक व्यवहार व संगठन' व ओमकारेश्वर श्रेष्ठं 'नेवाः लोकभाषा' नांगु ज्यापौ न्ह्यब्वयादिल। थुपिं ज्यापौयात छसिकथं डा. सुन्दरकृष्ण जोशी व डा. तेजरत्न कंसाकारपिंसं टिप्पणी यानादिल। थ्व धुंकाः निगूगु सेसनय् डा. तुयूबहादुर महर्जनया अध्यक्षताय् तुलसीलाल सिंहं 'नेपालभाषाया प्रारम्भिक लोकम्ये' व वज्रमुनि वज्राचार्यं 'प्रदर्शनकारी संस्कृति' धइगु ज्यापौ न्ह्यब्वयादिल। थ्व निगुलिं ज्यापौयात डा. त्रिरत्न मानन्धरं टिप्पणी यानादिल। अथे हे लिपांगु सेसन तुलसीलाल सिंहया अध्यक्षताय् न्ह्यात। थुकी ईश्वरी मैंया श्रेष्ठं 'नेवाः तिसा वसः, समाः व लोक उपचार' व काजिमान डंगोलं 'परम्परागत नेवाः कृषि प्रणाली' नांया ज्यापौ न्ह्यब्वयादिल। थुपिं ज्यापौयात छसिकथं प्रा. प्रेमशान्ति तुलाधर व डा. तुयूबहादुर महर्जनपिंसं टिप्पणी यानादीगु खः ।

गोष्ठीया स्वन्हु कुन्हु आइतवाः दकलय् न्हापां प्रा. माणिकलाल श्रेष्ठया अध्यक्षताय् तेजप्रकाश श्रेष्ठं 'लोकसाहित्यया परिचय' व राजित बहादुर श्रेष्ठं 'नेवाः लोकसाहित्यविद्पिं' धइगु ज्यापौ न्ह्यब्वयादिल। थ्व नितां ज्यापौयात कयाः डा. चुडामणि बन्धुं टिप्पणी यानादिल। थनंलि निगूगु सेसनय् ओमकारेश्वर श्रेष्ठया अध्यक्षताय् योगेन्द्र राजकर्णिकारं 'नेवाः लोक संगीत' व शरद कसाःपाखें 'नेवाः जातिया परिचय' नांगु ज्यापौ न्ह्यब्वयादिल। थुपिं ज्यापौयात कयाः छसिकथं रामशरण दर्नाल व प्रा. माणिकलाल श्रेष्ठपिंसं टिप्पणी यानादिल। दकलय् लिपा गोष्ठीया समापन ज्याझ्वः विभागीय प्रमुख डा. प्रेमशान्ति तुलाधरया सभापतित्वय् न्ह्यात। थुगु सभाय् मूपाहां कथं झायादीम्ह सभासद् तीर्थराम डंगोलं स्वन्हुयंकं जूगु गोष्ठीइ ज्यापौ न्ह्यब्वयादीपिं व टिप्पणी यानादीपिंत दसिपौ व चिं लःल्हानादिल। अले नुगःखँ प्वंकेगु झ्वलय् थन न्ह्यब्वःगु फुक्क ज्यापौयात मुनाः पिथनीगु सफूयात माक्व ग्वाहालि यायेगु नं बचं बियादिल। ज्याझ्वलय् प्रा. माणिकलाल श्रेष्ठ व लोकसाहित्यविद् केशरलाल श्रेष्ठपिंसं नं नुगःखँ प्वंकादीगु खः ।

नेपालभाषाया एमए तगिमय् नेवाः लोकवार्ता विषयय् ब्वने ज्वलं दयेकेगु ल्याखं थुकथं झिंप्यंगू ज्यापौ च्वके बियाः स्वन्हुयंकं अभिमुखीकरण गोष्ठी याःगुली विभागयात ग्वाहालि जुइकथं ईश्वरमान श्रेष्ठ व रीतादेवी प्रधानपिंसं सलंसःगू सफू देछायादीगु खः ।