शाक्य महाधिवेशनया सहलह
येँ (सन्ध्या टाइम्स)/कीर्तिपुण्य महाविहार (लगंबाहाः) या कचा विहार च्वाकं बहिली लगंबाहाःया शाक्य सहलह जुल। राष्ट्रिय शाक्य समाज नेपालया ग्वसालय् जुइगु 'शाक्य राष्ट्रिय महाधिवेशन' ब्वति कायेगु लिसें उगु ज्याझ्वःयात थःपिंपाखें फुगुचाःगु ग्वाहालि यायेगु नापं परिवार तथ्यांक विवरण फाराम जायेकाः समाजया सदस्यता कायेगु ताः तयाः उगु सहलह मुँज्या जूगु खः ।
ज्याझ्वलय् नेपाः राष्ट्रिय पार्टीया नायः नापं बुद्धिजीवी डा. केशवमान शाक्यं सहलह मुँज्याया आवश्यकता व सान्दर्भिकता बारे कनादीगु खःसा स्थविर चन्द्रकाजी शाक्यं समाजया महाधिवेशन ताःलाकेमाःगु विषयय् नुगःखँ तयादीगु खः ।
भाजुरत्न शाक्य महास्थविर मू पाहां कथं झाःगु उगु ज्याझ्वः प्रेम शाक्य स्थविरया सभापतित्वय् जूगु खःसा शान्तरत्न शाक्यं लसकुस यानादीगु खः। ज्याझ्वलय् आः जुइगु शाक्य महाधिवेशनय् सकलें शाक्यबन्धुं सक्रियपूर्वक ब्वति कायेत नं इनाप याःगु खः ।
