नागरिक धर्ना जारी
क्वःछिनातःगु इलय् हे संविधान निर्माण यायेत दबाव बीगू नितिः बुधवाः निसें धर्ना च्वनाच्वंपिं नागरिक समाजया अगुवातय्सं अझ धर्ना बियाच्वंगु दु । बुधवाः सुथय् च्यताः इलं निसें न्ह्याःगु ४८ घण्टे नागरिक धर्ना शुक्रवाः सुथय् च्याताः इलय् तक च्वनीगु ज्याझ्वः दु ।
इलय् हे संविधान दयेकेमाःगु, राजनीतिक गतिरोध अन्त्य याकनं यायेमाःगु, देशय् शान्ति सुरक्षा कायम यायेमाःगु लगायत माग यानाः लोकतन्त्र व शान्तिया निंतिं नागरिक आन्दोलनं न्हू बानेश्वरय् दुगु संविधानसभा भवनया पश्चिम गेट न्ह्यने धर्ना बियाच्वंगु खः ।
नागरिक आन्दोलनं पीच्याघौ धर्ना ज्याझ्वः लिपाः वइगु फागुन २५ गते बानेश्वरय् नागरिक सभा याइगु ज्याझ्वः दु । संविधान निर्माणया निंतिं दवाब बीत चरणबद्ध आन्दोलन यानावयाच्वंगु नागरिक समाजं थ्वस्वयां न्ह्यः झिंनिघौ व नीप्याघौ तक धर्ना बिया दबाव बी धुंकूगु दु ।
