माओवादी जिम्मेवार जुइमाल : प्रम
प्रधानमन्त्री माधवकुमार नेपालं प्रमुख प्रतिपक्षी दल एनेकपा (माओवादी) जिम्मेवार जूसाः इलय् हे संविधान निर्माण जुइगु दाबी यानादीगु दु । नापं वय्कलं माओवादीं लचकता क्यंसाः सेना समायोजन यायेगु ज्या याकनं यायेफइगु नं धयादिल । वय्कलं सेना समायोजन यानाः निर्धारित इलय् न्हूगु संविधान जारी यायेत सहमति व सहकार्य आवश्यक जूगु धयादिसें माओवादीयात सहमतिया लँपू ज्वनेत इनाप यानादिल ।
भारतया सिक्किम मणिपाल विश्वविद्यालयया अध्ययन केन्द्रया कलेज फर प्रोफेसनल स्टडिजया न्हापांगु दीक्षान्त समारोहया उल्लेज्या यानादिसें वय्कलं सरकार मंकाः सहमति व सहकार्यया निंतिं न्ह्यावलें तयार जूगु धयादिल । वय्कलं सहकार्यया निंतिं थःथःगु थासं फक्वं योगदान बीत दक्वं राजनीतिक दल, नागरिक समाज, शैक्षिक संस्था, पेसाकर्मी लगायतत इनाप यानादिल ।
प्रधानमन्त्री नेपालं देय्यात उन्नति पाखे यंकेगु जिम्मा दीक्षित विद्यार्थीतय्गु जूगु धयादिसें दक्वं नागरिकयात दक्ष दयेकाः रोजगारी बीफुसाः जक देय् सबल जुइगु धयादिल ।
