न्याम्ह सचिव बढुवा
मन्त्रिपरिषद्या बैठकं बिहीवाः न्याम्ह सहसचिवयात सचिवय् बढुवा याःगु दु । बढुवा समितिं खाली दुगु न्यागू सचिव पदया निंतिं सिफरिस याःपिं झिंन्याम्ह मध्ये पाखें बैठकं शितलबाबु रेग्मी, विमल वाग्ले, महेन्द्रप्रसाद श्रेष्ठ, माधव घिमिरे व अनन्द पोखरेलयात बढुवा याःगु खः ।
अथेहे सरकारं विशेष परिस्थिति दुगु धासें मेसिन रिडेवल पासपोर्ट (एमआरपी)यात इलय् हे व्यवस्था यायेगु निंतिं परराष्ट्र मन्त्रालययात निर्देशन ब्यूगु दु । नापं दुई पक्षिय सहलहया आधारय् एमआरपी छापे यायेगु व्यवस्था मिले यायेत नं निर्देशन ब्यूगु दु ।
चैत १९ गते नेपालं एमआरपी लागु यायेमाःगु जूगुलिं वस्वयां न्ह्यः हे छपे यानाः हयेमाः । उकीया निंतिं प्रतिस्पर्धात्मक प्रकृया नालेवलय् समय अभाव जुइगुलिं विशेष परिस्थिति घोषणा याःगु खः ।
परराष्ट्र मन्त्रालयं बिहीवाःया बैठकय् भारतय् पासपोर्ट छापे यानाः हयेगु प्रस्ताव यंकूगु खःसां उकीया बारे सहलह हे मयासें लितछ्वःगु खः । बिहीवाः जक संसदया सार्वजनीक लेखा समितिं भारतया सुरक्षा प्रेसयात छापे याये बीगुया सट्टा प्रतिस्पर्धात्मक व्यवस्था यायेत निर्देशन ब्यूगु खः ।
अथेहे मन्त्रिपरिषदया बैठकं शिविर त्वःतुपिं माओवादी लडाकु व शिविरया अवस्थाया अध्ययन यायेगु निंतिं मन्त्रालयया संयोजनय् न्हय्म्ह दुजः दुगु समिति गठन याःगु दु ।
