स्थगित जूगु प्रचण्डया भ्रमण

प्रधानमन्त्री पुष्पमकल दाहाल 'प्रचण्डं' कन्हसं निसें यायेत्यंगु युरोप भ्रमण ज्याझ्वः आःयात स्थगित याःगु दु । उखे देशय् थीथी कथंया समस्या वयाः देय् न्ह्याकेत हे थाकुयाच्वंगु व मेखे उगु भ्रमण दलय् सुयात तल सुयात मतल धकाः विवाद नं वयाच्वंगु कारणं भ्रमण हे स्थगित याना बिउगुलिं फुक्क झंझट हे क्वचाल । थौंया भद्रगोल अवस्थाय् प्रमपाखें विदेश चाःहिलेगु निर्णय रद्द याःगु पाय्छिगु ज्या खः ।

देय्या नेतात अप्वः विदेश भ्रमण जक वनाः राजश्व नाश यानाच्वंगु खँयात कयाः थन तःधंगु आलोचना
जुयाच्वंगु दु । भारत व चीन थेंज्याःगुदेशय् प्रधानमन्त्रीं तत्काल भ्रमण याःगु तक ला पाय्छि खः तर वयां बाहेक नेपाःलिसे खास हे स्वापू मदुगु देशय् नं भ्रमण याः वनेगु निश्चय नं अनावश्यक ज्या खः । देशय् राजश्व दुहां मवयाः लोडशेडिङया कारणं थप खर्च याये मालाः विश्वय् आर्थिक मन्दी वःगुलिं वैदेशिक ग्वाहालिया सम्भावना म्हो जुयाः अर्थतन्त्र हे डाँवाडोल जुयाच्वंगु ई खः । थज्याःगु इलय् तःधंगु पुचः ज्वनाः विदेश चाःहिलाः दुगु राजश्व नं क्वपालेगु अझ बांमलाःगु ज्या खः । थुकियात कम से कम नं आःया सरकारं सुधार याये हे माः । थ्व नेपाः हे संक्रमणकालय् लानाच्वंगु दु । नेपाःयात धाथें ग्वाहालि यायेत इच्छुक देतय्सं ला थः हे प्रतिनिधियात नेपाः छ्वया हयाच्वंगु दु । नेपाःयापिं अन वनेमाःगु आवश्यकता मदु । प्रधानमन्त्री प्रचण्डपाखें आः भ्रमण रद्द याःगु बांलाःगु ज्या खःसा मेमेपिं मन्त्रीतय्सं आः वय्कःपाखें शिक्षा कयाः अनावश्यक भ्रमण मयायेगु पलाः न्ह्याके माली । थुकिं सरकारया प्रतिष्ठा नं थकया बी ।

More Stories Like this