एमालेया दलितत १४ प्रदेशया विरोधय्

येँ (सन्ध्या टाइम्स)/सत्तारुढ पार्टी नेकपा (एमाले)या केन्द्रीय कमिटीया बैठकय् संविधानय् प्रस्ताव जुयाच्वंगु १४ प्रदेशया नक्सायात कयाः दलित लगायत छुं गैर जनजाति दुजःतय्सं
विरोध याःगु दु ।

म्हिगः च्वंगु केन्द्रीय बैठकय् कार्यदलया नायः भरतमोहन अधिकारीं थःपिनि प्रतिवेदन पेश याये धुनेवं संविधानसभाय् प्रस्तावित १४ प्रदेशयात कयाः टिप्पणी शुरु जूगु खः। उकी दकलय् कडा रुपं न्ववासें गृहमन्त्री भीम रावलं थ्व १४ प्रदेश दुगु नक्सायात स्वीकार याये हे मजिउ धयादिल। लिसें प्रदिप ज्ञवाली, पुष्प कँडेल, शंकर पोखरेलपिंसं नं उकिया विरोधय् बिचाः तयादिल। १४ प्रदेशया नक्साया विरोधय् न्ववाःपिं अप्वः यानाः ब्रम्हू क्षेत्री दुजःत जक खः। लिसें केन्द्रीय समितिइ दुथ्याःपिं दलित दुजःत जगत विश्वकर्मा, चुडामणि विश्वकर्मापिंसं नं जातीय क्षेत्रीय आधारय् नीस्वंगु १४ प्रदेशयात स्वीकार याये फइ मखु धयादिल ।

कार्यदलया नायः भरतमोहन अधिकारी नापं वामदेव गौतम आदिपिंसं नं थ्व १४ प्रदेशया नक्सा दकलय् पाय्छि खः धासें आः उकियात स्यंके मजिउगु बिचाः प्वंकादिल।
जनजाति दुजःत अशोक राई, रामचन्द्र झा आदिपिंसं धाःसा उकिया समर्थनय् बिचाः तयादीगु खः ।

ओलीया मनूत नं सरकार विरुद्ध

येँ (सन्ध्या टाइम्स)/एमालेया केन्द्रीय समितिइ ओली पक्ष धकाः म्हसिउपिं छुं केन्द्रीय दुजःतय्सं नं म्हिगः सरकारया विपक्षय् न्ववाःगु खँ सीदुगु दु। पार्टी नेता खडग ओली गुगु नं हालतय् थ्व सरकारयात बचे यायेमाः धइग पक्षय् दुसा वय्कःया गुट धकाः म्हसिउपिं खगराज अधिकारी, प्रदिप ज्ञवाली, कर्णबहादुर थापा आदिपिंसं देशय् शान्ति कायम यायेगु खःसा थ्वहे सरकार टिके याना तयेमाः धइगु मदु धकाः न्ववानादीगु खः। वय्कःपिंसं सरकार क्वःदलेफुगु संकेत बियादीगु खँ नं सूत्रं धाःगु दु ।