प्याकेजय् समाधान मालेगु संयन्त्रया निर्णय
प्रमुख स्वंगू राजनीतिक दल दुथ्याःगु उच्चस्तरीय राजनीतिक संयन्त्रं वर्तमान राजनीतिक गतिरोध, सत्ता साझेदारी लगायत दक्वं विषययात प्याकेजय् समाधान यायेगु निर्णय याःगु दु । वर्तमान राजनीतिक गतिरोध अन्त्यया निंतिं मंकाः संकल्प प्रस्ताव तयार यायेमफेवं प्याकेजय् सहमति मालेगु निर्णय याःगु खः ।
बिहीवाः नेपाली कांग्रेसया सभापति नापं संयन्त्रया संयोजक गिरिजाप्रसाद कोइरालाया निवास महाराजगंजय् जूगु बैठक लिपाः एमाले अध्यक्ष झलनाथ खनालं प्याकेजय् सहमति यायेगु निर्णय जूगु कनादिसें थ्व गम्भीर व महत्वपूर्ण निर्णय जूगु कनादिल । वयेकलं वइगु १८ गते सत्ता साझेदारी, न्हूगु संविधान निर्माण, राज्य पुर्नसंरचना आयोग व माओवादी लडाकुया बारे प्याकेजय् निर्णय यायेगु सहमति जूगु कनादिल ।
थ्वस्वयां न्ह्यः राजनीतिक गतिरोध अन्त्य यायेत संयन्त्रं स्वंगू दलया नेतात दुथ्याःगु कार्यदलयात जिम्मेवारी ब्यूगु खः । कार्यदलय् सहमति मजुइवं थुकीया जिम्मा संयन्त्रयात हे ब्यूगु खः । शीर्ष नेतातय् बैठकय् व कार्यदल स्तरया नेतात बैठकय् माओवादीं सरकार हिलेमाःगु व कांग्रेसं राष्ट्रपतियात छुं नं हालतं द्वपं बीमज्यूगु अडान काःगुलिं सहमति जुइमफुगु खः ।
