माओवादीं तत्काल केन्द्रीय समिति विस्तार मयाइगु
एकीकृत नेकपा (माओवादीं) तत्काल थःगु केन्द्रीय समिति विस्तार माइगु जूगु दु । १३७ म्ह दुजः दुगु केन्द्रीय समिति विस्तार यानाः १७५म्ह दुजः दयेकेगु निर्णय याःसां थप यायेगु केन्द्रीय दुजःतय् नांमय् सहमति जुइमफेवं आःयात केन्द्रीय समिति विस्तार मयायेगु निर्णय याःगु खः ।
केन्द्रीय समिति विस्तार यायेत राज्य समितिया दुजःत नापं स्थायी समिमितया दुजःत नाप बुधवाः तःक्वः हे सहलह याःसां सहमति जुइमफुगु खः । पार्टी प्रवक्ता दिनानाथ शर्मां संगठनात्मक संरचनाया बारे थप अध्ययन यानाः जक केन्द्रीय समिति विस्तार यायेगु बारे आवश्यक निर्णय याइगु कनादिल ।
थुकीया दथुइ बिहीवाः च्वंगु माओवादीया केन्द्रीय समितिया बैठकं इलय् हे संविधन निर्माण यायेगु थःपिनिगु न्हापांगु जिम्मेवारी जूगु निष्कर्ष पिकासें उकी दक्वं ध्यान केन्द्रीत यायेगु निर्णय याःगु दु । अथेहे राष्ट्रिय स्वाधीनता व संविधान निर्माणया निंतिं थप दववामूलक ज्याझ्वः क्वःछीत फाल्गुन २० निसें २४ तक राज्य समितिया इन्चार्ज सहितया बैठक च्वनेगु निर्णय याःगु दु । नापं बैठकं फाल्गुन २७ निसें चैत्र १२ तक न्हय्न्यागूलिं जिल्लाय् प्रशिक्षण ज्याझ्वः संचालन यायेगु निर्णय नं याःगु दु ।
