सँझ्याःया प्याखं कासाय् पद्मकन्याया 'बिलागः' न्हाप
सँझ्याः साहित्य पाला पब्लिक युथ क्याम्पसया ग्वसालय् जूगु झिंछक्वःगु अन्तर क्याम्पस नेपालभाषा छधाः प्याखं धेंधें बल्लाः कासाय् पलेस्वां साहित्य पुचः पद्मकन्या क्याम्पसया 'बिलागः' न्हाप लाःगु दु । अथे हे विश्वभाषा साहित्य पालाया 'भुखाय्' लिउ व अन्नपूर्ण कलेजया 'झ्यालखाना' लियांलिउ लात । तिसा साहित्य पाला ललितकलाया 'झी नं द्यः जुइ न' यात हःपाः सिरपाः लात ।
उत्कृष्ट निर्देशक 'बिलागः' या शुभरत्न वज्राचार्य, उत्कृष्ट लेखन 'भुखाय्'या सुरेश किरण, उत्कृष्ट मिजं प्याखंम्वः निभाः साहित्य पाला (अस्कलं) न्ह्यब्वःगु 'न्हूगु नेपाः'या रविन्द्र व उत्कृष्ट मिसा प्याखंम्वः 'भुखाय्'या विनिता महर्जनं त्याकल । अथे हे उत्कृष्ट दबू छाय्पाः नं 'भुखाय्'या शंकर महर्जनं त्याकलसा उत्कृष्ट समाःया सिरपाः 'न्हूगु नेपाः'या जीना घिमिरें त्याकल ।
सिरपाः त्याकूपिंत त्रिविवि शिक्षाध्यक्ष सूर्यलाल अमात्य व सभासद् प्रकाशमान सिंहं सिरपाः व दसिपौ लःल्हानादीगु खः ।
उगु हे ज्याझ्वलय् नेपालभाषा कला व नाट्य ख्यलय् न्ह्यथनेबहःगु योगदान यानादीपिं मदुम्ह महेश जोशी, च्विम रामशेखर नकःमि, निर्देशक प्रचण्ड मल्ल व संजय शर्मापिंत पब्लिक युथ क्याम्पसया प्रमुख मय्जु गीता मल्लं हनापौ लःल्हानादीगु खः ।
कासाया मू निर्णायकय् त्रिभूवन विश्वविद्यालयया डा. सुन्दरकृष्ण जोशी व निर्णायकय् वरिष्ठ कलाकार व निर्देशक राम शेखर नकःमि व प्रचण्ड मल्लिपं च्वनादीगु खः । ज्याझ्वलय् विजेन श्रेष्ठ, सिलु अधिकारी, सुलिन्द्र शाक्य, रुमन जोशी, भोगेन्द्र मानन्धर, भिंतुना जोशी, लक्ष्मी के.सी.पिंसं म्ये व हुलाप्याखं न्ह्यब्वःगु खः ।
कासाय् पाहां प्याखं कथं सँझ्याः साहित्य पालापाखें सुरेन्द्र तुलाधरया निर्देशनय् 'घःसू भ्वय्' न्ह्यब्वःगु खः ।
