'इलय् हे संविधान निर्माण यानाः देय्यात निकास बीमाः'
राष्ट्रपति डा. रामवरण यादवं निर्धारित इलय् हे संविधान निर्माण यानाः देय्यात निकास बीमाःगु खँय् बः बियादीगु दु । वय्कलं उकीया निंतिं ल्यँ दनीगु स्वलायात फक्व सदुपयोग यायेमाःगु खँ धयादिल । नापं वय्कलं राजनीतिक दलतय्त मिलेजुया संविधान निर्माण यायेगु ज्याय् लगे जुइत इनाप नं यानादिल ।
बिहीवाः पत्रकार महासंघया केन्द्रीय साधारण सभाया नेपालगञ्जय् उल्लेज्या यानादिसें राष्ट्रपति यादवं देशय् तःधंगु संघर्ष लिपाः प्राप्त परिवर्तनयात संस्थागत यासें न्ह्याः वनेमाःगु हाथ्या झी न्ह्यने दुगु धयादिसें उपब्धियात संस्थागत यायेत पत्रकारतय् अप्व भूमिका दइगु धयादिल । लोकतन्त्र प्राप्तिया आन्दोलनय् पत्रकारतय्सं तःधंगु योगदान ब्यूगु चर्चा यानादिसें वय्कलं आः पत्रकारतय् भूमिका अझ अप्वःगु धयादिल ।
ज्याझ्वलय् सूचना व संचारमन्त्री शंकर पोखरेलं स्वतन्त्र व सक्षम प्रेसया निंतिं सरकार प्रतिबद्ध जूगु धयादिल । वय्कलं गैरराज्य पक्ष पाखें पत्रकारतय्त जूगु घटना प्रति सरकार संवेदनशील जूगु धयादिसें दोषीतय्त कारवाही यायेत सरकार गम्भीर जूगु धयादिल ।
भौतिक व व्यवसायीक सुरक्षाया निंतिं पत्रकार एकता, न्हू संविधानय् पूर्ण प्रेस स्वतन्त्रता धइगु नारा बियाः सुरु जूगु पत्रकार महासंघया साधारण सभा शुक्रवाः तक न्ह्याइ ।
