संविधान निर्माणया निंतिं ४८ घण्टे नागरिक धर्ना
निर्धारित इलय् हे संविधान निर्माण यायेत राजनीतिक दलतय् ध्यानाकर्षण याकेगु निंतिं लोकतन्त्र व शान्तिया निंतिं नागरिक आन्दोलनं संविधान सभा भवन न्ह्यने धर्ना बियाच्वंगु दु । न्हू बानेश्वरय् दुगु संविधानसभा भवनया पश्चिम गेट न्ह्यने बिहीवाः सुथसिया च्याताः इलं निसें पीच्याघौ धर्ना च्वनीगु खँ नागरिक आन्दोलनं धाःगु दु ।
संविधान निर्माणया निंतिं दवाब बीत चरणबद्ध आन्दोलन यानावयाच्वंगु नागरिक समाजं थ्वस्वयां न्ह्यः झिंनिघौ व नीप्याघौ तक धर्ना बिया दबाव बी धुंकूगु दु । नागरिक अगुवात डा. देवेन्द्रराज पाण्डे, कृष्ण पहाडी, श्याम श्रेष्ठ, पद्मरत्न तुलाधर, डा. रेणु राजभण्डारी, डा. सुन्दरमण्डी दिक्षित लगायत धर्ना च्वनाच्वंगु दु ।
नागरिक आन्दोलनं पीच्याघौ धर्ना ज्याझ्वः लिपाः वइगु फागुन २५ गते बानेश्वरय् नागरिक सभा याइगु ज्याझ्वः दु ।
