माओवादीया सरकार लिपाः जक न्हूगु संविधान : प्रचण्ड
एनेकपा (माओवादी)या अध्यक्ष पुष्पकमल दाहाल 'प्रचण्डं' माओवादी नेतृत्वय सरकार गठन मजुतल्ले न्हूगु संविधान निर्माण जुइमफइगु दाबी यानादीगु दु । वय्कलं माओवादी नेतृत्वया सरकार गठन लिपाः जक न्हूगु संविधान जारी जुइगु नं धयादिल ।
माओवादी जिल्ला संगठन गोरखां आरुघाटय् बुधवा: याःगु आमसभायात सम्बोधन यानादिसें अध्यक्ष प्रचण्डं सरकार परिवर्तनया निंतिं उच्चस्तरीय राजनीतिक संयन्त्रय् सहलह जूगु व उकीया निंतिं पहल नं जूगु धयादिसें संविधान निर्माण मजुसाः उकीया विकल्प जनविद्रोह जूगु धयादिल । अथेहे उच्चस्तरीय संयन्त्र संविधान निर्माणया निंतिं गठन जूगु दाबी नं वय्कलं यानादिल ।
माओवादी अध्यक्ष प्रचण्डं संविधानसभाय् त्याःपिंसं संविधान निर्माणया नेतृत्व यायेमाःगु खँय् बः बयादिसें चुनावय् बूपिनिगु नेतृत्वय् संविधान निर्माण जुइमफइगु धयादिल । वय्कलं चुनावय् त्याःपिनि नेतृत्वया सरकारं जारी याःगु संविधानं जक गणतन्त्रया संस्थागत विकासया निंतिं लँपू चायेकीगु दाबी यानादिल ।
