मन्त्रिपरिषदया बैठक स्वक्व: तक स्थगित
मन्त्रिपरिषदया बैठक बुधवाः च्वनेगु धकाः स्वक्वः तक ई क्वःछउगु खःसां थौं च्वनेमफुत । बुधवाः सुथय् च्याताः इलय्, न्हिनसिया स्वताः व प्यताः इलय् मन्त्रिपरिषदया बैठक च्वनेगु धकाः क्वःछीनातःगु खःसां सरकारं प्रधानमन्त्री माधवकुमार नेपलाया कार्यव्यस्थताया कारण स्थगित यायेमाःगु खँ धाःगु दु ।
तर नेपाली कांग्रेसं नेपाल राष्ट्र बैंकया गभर्नर व राष्ट्रिय योजना आयोगया उपाध्यक्ष मध्ये छगू पद थःगु सिफारिस कथं जुइमाःगु अडान कायेवं उकी सहमति जुइमफया मन्त्रिपरिषदया बैठक च्वनेमफुगु खँ सुत्रं धाःगु दु । सुत्रया कथं निगूलिं पद तसकं महत्त्वपूर्ण जूगुलिं एमालें निगूलिं पदय् त्व:ते चाहे जूगु मदु ।
नेपाल राष्ट्र बैंकया गर्भनर, राष्ट्रिय योजन आयोगया उपाध्यक्ष नियुक्ति सम्बन्धि निर्णय यायेत बुधवाः मन्त्रिपरिषदया बैठक च्वनेत्यंगु खः । अथेहे बैठकय् उपप्रधान नापं परराष्ट्रमन्त्री सुजाता कोइरालां मेसिन रिडएवल पासपोर्ट (एमआरपी)या मुद्रणया जिम्मेवारी भारतीय कम्पनीयात बीत या:गु प्रस्तावया बारे नं निर्णय यायेगु ज्याझ्वः दुगु खः ।
