जातीय युद्ध ब्वलनेफु : बिजुक्छे
नेपाल मजदुर किसान पार्टीया अध्यक्ष नारायणमान बिजुक्छें नेपाःया संघीयता जातीयताया आधारय् वनाच्वंगुलिं जातीय युद्ध ब्वलनेफुगु ख्याच्वः बियादीगु दु । वय्कलं तःधंगु राजनीतिक दलं संघीय राज्यया नांमय् जातीय राज्य न्ह्यने सारे यानाः देयन्यंक जातीय आतंक ब्वलंकूगु द्वपं नं बियादिल ।
प्रभात सार्वजनिक शैक्षिक गुठीपाखें संचालित प्रभात उच्च माध्यमिक विद्यालयया नीच्याक्वःगु वार्षिकोत्सव ज्याझ्वःया बुधवाः उल्लेज्या यानादिसें वय्कलं स्वंगू तःधंगु दलं स्पष्ट दृष्टिकोण तःसा व छुं नं बाधा व्यवधान मवसाः जेठ १४ गते दुने संविधान निर्माण जुइगु दाबी यानादिल । वय्कलं संविधान इलय् हे जारी मजुसाः स्वंगू दल हे जिम्मेवार जुइगु धयादिसें माओवादीं सत्ता प्राप्ति यायेगु स्वयां प्रमुख प्रतिपक्षया भूमिका निर्वाह यायेमाःगु धायादिल ।
वय्कलं स्वंगू दलया उच्चस्तरीय राजनीतिक संयन्त्र प्रति न्ह्यसः थनादिसें थुकीं याइगु छुं नं निर्णयं कानूनी मान्यता प्राप्त मयाइगु धयादिल । नापं वय्कलं संयन्त्रय् याइगु सहलह संसदय् निर्णय यायेमाःगु खँय् बः बियादिल ।
अथेहे वय्कलं माओवादी लडाकूया समायोजन योग्यताया आधारय् जुइमाःगु धयादिसें लडाकुतय्त तप्यंक नेपाली सेनाय् समायोजन यायेमज्यूगु धयादिल ।
