गभर्नरय् एमाले हानं हिस्स
सत्तारुढ पार्टी माओवादीं सत्ताया मेगु साझेदार पार्टी एमालेयात हानं छक्वः झंगः लाःगु दु । नेपाल राष्ट्र बैंकया गभर्नर पद एमालेयात बीगु धकाः सहमति यानाः नं अन्ततः नियुक्त याःबलय् थःगु हे पार्टीया कार्यकर्ता जुयाच्वंम्ह भाजु दिपेन्द्रबहादुर क्षेत्रीयात गभर्नर दयेकूगु दु ।
२०४६ सालय् कर्मचारी आन्दोलनयात धकाः निलम्बनय् लाःम्ह क्षेत्री आन्दोलनया सफलता लिपा हानं बैंकय् दुहां वंम्ह खः । बैंकर स्वयां नं कर्मचारी पृष्ठभूमियाम्ह वय्कः जनयुद्ध ताकाय् माओवादीयात गोप्य रुपं ग्वाहालि याना वयाच्वंम्ह कार्यकर्ता खः ।
गभर्नरया रुपय् वय्कःया कार्यकाल ११ महिना बर्खास्त जूम्ह पूर्व गभर्नर डा. विजयनाथ भट्टराईया ल्यं दनिगु अवधि जक जुइ । वयां लिपा गभर्नर नियुक्तिया मेगु प्रक्रिया शुरु जुइगु खँ धाःगु दु । न्हूम्ह गभर्नर नियुक्तिया लागिं जूगु नां सिफारिशय् गनं नं राजनीतिक स्वापू मदुम्ह वर्तमान कामु गभर्नर कृष्णबहादुर मानन्धरं धाःसा थःगु नां लित कयादीगु खः ।
योजना आयोगय् मेम्ह शर्मा
न्हूम्ह गभर्नर जुइम्ह धकाः एमालें तयार यानातःम्ह युवराज खतिवडायात सरकारं राष्ट्रिय योजना आयोगय् नं मयंकू । योजना आयोग उपाध्यक्षय् डा. गुणनिधि शर्मायात हःगु दु । खतिवडा व माधव नेपालया लागिं सभासदं राजीनामा बियादीम्ह सुशीलचन्द्र अमात्ययात राजदूत दयेकीगु चर्चा दु ।
