मंकाः संघर्ष समितिइ नरेश ताम्राकार न्हूम्ह नायः

येँ (सन्ध्या टाइम्स)/नेवाः स्वायत्त राज्य मंकाः संघर्ष समितिया न्हूम्ह नायः कथं नरेश ताम्रकारयात ल्यःगु दु। वय्कः नेवाःतय्गु राष्ट्रिय संगठन नेवाः देय् दबूया नायः खः। संघर्ष समितिया नायः सम्बन्धी न्हूगु नियम कथं वय्कः थनिंनिसें मुक्कं नीन्हु (२० न्हु) जक नायः जुयादी ।

नेवाः स्वायत्त राज्य मंकाः संघर्ष समितियात अझ व्यवस्थित व प्रभावकारी याना यंकेगु निंतिं दयेकूगु न्हूगु सांगठनिक संरचना कथं ताम्राकार थनिंनिसें नायः जुयादीगु खः। संघर्ष समितिं न्हापा स्वला स्वलाय् नायः हिलेगु नियम दयेका तःगु खःसां आवंलि लछि लछिं नायः हिलेगु नापं नायः पुचःयात निर्देशन पुचःया रुपय् यंकेगु निर्णय याःगु दु। न्हापां नायः जुइगु पाः संस्थापक दुजः खलःयापिनि जुइसा अनं लिपा संघर्ष समितिइ दुथ्याःगु दुजः खलःया नायःपिं रोमन लिपिया आधारय् सुयागु नां न्ह्यःने लात वहे न्हापां नायः जुइगु व्यवस्था याःगु दु। नेपाल संवत्या तिथि कथं लछि तक नायः जुइगु व्यवस्था दुसा थौं दशमि तिथि जुइधुंकूगुलिं न्हूम्ह नायःया म्याद आमै तक (नीन्हु) जक दनि ।

थ्व न्हूगु नियम कथं थनिंनिसें हे संघर्ष समितियात अझ प्रभावकारी दयेकेत मल्ल के. सुन्दरया नेतृत्वय् छगू स्थायी पुचः दयेकूगु दु। उगु पुचलय् वर्तमान नायः, लिपा जुइम्ह नायः, छ्याञ्जे व दांभरि दुजः कथं दुथ्याइ। लिसें नेवाः स्वायत्त राज्यया निंतिं प्रतिवद्ध नेवाः खलः पुचःत दुथ्याकाः संघर्ष समितिया परिषद् नं दयेकीगु जूगु दु। न्हूगु नायः वयेवं पुलांम्ह नायः नरेन्द्रभक्त हाडाया कार्यकाल नं थनिं निसें क्वचाःगु दु ।

आः लय् लय् पतिकं हिलीपिं नायः
नेवाः स्वायत्त राज्य मंकाः संघर्ष समितिया न्हूगु संरचना कथं आः लय् लय्पतिकं नायः जुयादीपिं छसीकथं थथे दु -
१) नरेश ताम्रकार (नेवाः देय् दबू) थनिंनिसें जूम्ह न्हूम्ह नायः
२) सानुराजा शाक्य (नेपाः लोकतान्त्रिक नेवाः संघया नायः)
३) सुजिव बज्राचार्य (नेवाः जागरण मञ्चया नायः)
४) नरेशवीर शाक्य (नेवाः ल्याय्म्ह न्ह्यलुवाया नायः)
५) विपेन्द्र महर्जन (ज्यापु महागुथिया नायः)
६) रामकाजी अवाले (ज्यापु समाज यलया नायः)
७) गजेन्द्रमान मानन्धर (लोकतान्त्रिक नेवाः दबूया नायः)

न्हापा नायः जुइधुंकूपिं
संघर्ष समितिइ न्हापा स्वला स्वलाय् नायः जुइगु खःसां आः तक स्वम्ह नायः जुइधुंकूगु दु, वय्कःपिं खः -
क) दिलबहादुर श्रेष्ठ (नेवाः मुक्ति मंकाः दबू प्यला तक नायः)
ख) हितमान शाक्य (नेवाः राष्ट्रिय मुक्ति मोर्चा प्यला तक नायः)
ग) नरेन्द्रभक्त हाडा (नेवाः देय् गुथि नेपालमण्डल न्हय्ला तक नायः जुयादीगु)