नेवाः साहित्यकार व समाजसेवीतय्त शान अवार्ड
येँ (सन्ध्या टाइम्स)/नेपाःया न्हापांगु साहित्यिक समाचारपत्र 'सूचक'पाखें प्यम्ह नेवाः साहित्यकार व समाजसेवीतय्त शान अवार्ड व निम्ह नेपालभाषासेवीपिंत साहित्यसेवा सिरपाः बिउगु दु ।
'सूचक'या निक्वःगु वार्षिक उत्सवया लसताय् जूगु छगू ज्याझ्वलय् राष्ट्रकवि माधव प्रसाद घिमिरें साहित्यकारपिं चन्द्रकला नेवार, जलेश्वरी श्रेष्ठ, रेवती राजभण्डारी, समाजसेवी कृष्णबहादुर श्रेष्ठ व बौद्ध लामा गुरु ल्हुन्डुप लामायात उगु अवार्ड लःल्हानादीगु खः ।
उगु हे ज्याझ्वलय् नेपालभाषाया बाखं च्वमि सुवर्णकेशरी चित्रकारयात पद्मावती साहित्यसेवा सिरपाः व डा. जनकलाल वैद्ययात सुवर्णरत्न साहित्य सेवा सिरपाः नं लःल्हाःगु खः।
ज्याझ्वलय् न्ववासें कवि माधव घिमिरें शान अवार्ड नेपालय् नं शुरु यानाः 'सूचकं' अन्तर्राष्ट्रिय महत्वया ज्या याःगु बिचाः प्वंकादिल। च्वमि बारबरा एडम्सं नेपालं शान अवार्ड सञ्चालन जूगु नेपाःया लागिं गौरवया खँ खः धयादिल।
ज्याझ्वःया सभापति व सूचकया सम्पादक दीपक भेटुवालं शान अवार्ड व थुकिया अन्तर्राष्ट्रिय संस्थापक रुसी च्वमि सेर्गेइनाइल कारानोमी बारे कनादिल। उगु हे ज्याझ्वलय् शान अवार्डया मानार्थ संरक्षक श्रीधर शम्सेर जबरा व जिल्ला प्रतिनिधितय्त दसिपौ नं लःल्हाःगु खः ।
