सवारी दुर्घटनाय् स्वम्ह सित, राजमार्ग बन्द
येँ (सन्ध्या टाइम्स)/मकवानपुर व झापाय् थौं सुथय् जूगु सवारी दुर्घटनाय् लानाः निम्ह मनू सीगु दुसा न्याम्ह घाःपाः जूगु दु ।
मकवानपुरया बसामाडी लागाय् थौं सुथय् ६ बजे ना. ४ ख १७१७ नम्बरया ट्रकं ठक्कर नकाः निर्मल उच्च माविया १२ कक्षाय् ब्वनाच्वंम्ह जयन्त स्याङतान सीगु दु। प्रहरीं उगु ट्रक व चालकयात नियन्त्रणय् काःगु दु। अथे दुर्घटना जुइवं क्षतिपूर्ति व कारवाहीया माग यानाः स्थानीय मनूतय्सं नापं विद्यार्थीतय्सं प्रदर्शन याःगु हुनिं थौं सुथंनिसें हे पूर्वपश्चिम राजमार्ग अन्तर्गत बसामाडी बस्तीपुर लागाय् यातायात ठप्प जूगु दु ।
अथे हे विराटनगरय् नं थौं सुथय् को. १ त ४९५६ नम्बरया ट्याक्टर दुर्घटना जुयाः हिरा उराव सीगु दुसा न्याम्ह मनू घाःपाः जूगु दु। उगु हे कथं चितवनय् नं वंगु चान्हय् निगः ट्रक ल्वानाः चालक प्रदीप राय घटनास्थलय् हे सीगु दु ।
